Исроил бош вазири Биньямин Нетаньяху 17 март куни Германия канцлери Олаф Шольц билан учрашгандан сўнг Исроил армиясининг (ЦАХАЛ) аввалроқ эълон қилинган Ғазо секторидаги Рафаҳга ҳужумини кечиктиришга тайёрлигини айтди. Бу ҳақда Deutsche Welle хабар берди.
Малум бўлишича, учрашувда канцлер Исроилни ўт очишни узоқроқ муддатга тўхтатиш бўйича музокаралар олиб боришга чақирган.
Исроилнинг мақсади “ҲАМАС батальонларини йўқ қилиш” бўлиб қолаверади, — деди Нетаньяху Шольц билан учрашувда.
Шольцнинг таъкидлашича, ҳозирда Ғазонинг жануби-ғарбий қисмидаги шаҳарда 1,5 миллион одам ўта оғир шароитда яшамоқда ва ҳимояга муҳтож. Канцлер Нетаньяхуга тинч аҳоли орасида қурбонларнинг кўплигини ҳам таъкидлаган. AFP’га кўра, Шольц шунингдек, инсонпарварлик ёрдами билан боғлиқ вазиятни сезиларли даражада яхшилашга интилмоқда.
Германия канцлери Иордания ва Исроилга икки кунлик сафари олдидан инсонпарварлик ёрдами етказилишини таъминлаш учун Ғазодаги ҳарбий ҳаракатларни тезроқ тўхтатишга чақирган эди.
Шу билан бирга у Исроилни Рафаҳда ҳарбий операция ўтказишдан яна бир бор қайтаришга уринган.
Биз кейинги ҳарбий ҳаракатлардан хавотирдамиз. Хусусан, Рафаҳга ҳужум тинч аҳоли вакиллари орасида қурбонлар кўпайишига олиб келиши мумкин, ҳар қандай ҳолатда ҳам бунинг олдини олиш керак, — дея қўшимча қилган Шольц.
Изоҳ (0)