АҚШ Адлия вазирлиги Apple компаниясини смартфонлар бозорини монополлаштириш ва рақобатни бостиришда айблаб, судга мурожаат қилди, дея CNN хабар берди.
Аризада вазирлик компания рақобатчилар ва истеъмолчилар имкониятларини ноқонуний чеклаш учун iPhone’ни назорат қилишдан фойдаланганини даъво қилган, шунингдек, Apple’ни янги иловаларнинг ўсишига тўсқинлик қилаётганликда ва рақобатдош маҳсулотларнинг жозибадорлигини пасайтирганликда айблаган.
Даъвода компаниянинг истеъмолчиларга рақобатдош смартфон платформалари ўртасида алмашишни осонлаштирадиган иловаларни блоклаши, учинчи томон рақамли ҳамёнларини чеклаши ва бошқа компаниялар томонидан ишлаб чиқарилган ақлли соатларнинг “функционаллигини камайтириш” ҳақида айтилган. Адлия вазирлигига кўра, мижозлар iPhone’дан фойдаланишни давом эттиришга мажбур бўлиши учун бошқа қурилмаларда ўзининг хабар алмашиш иловаси сифатини ёмонлаштирган.
Apple каби монополиялар иқтисодиётимиз асосланган эркин ва адолатли бозорларга таҳдид солади. Улар инновацияларни тўхтатади, истеъмолчилар учун харажатларни оширади. Агар Apple’га қарши чиқилмаса, у монополиясини кучайтиришда давом этади, — деди бош прокурор Меррик Гарланд.
Apple АҚШ Адлия вазирлигининг айбловларини рад этган ва даъво компаниянинг асосий фаолиятига таҳдид солаётганини айтган.
Ушбу даъво бизнинг кимлигимизга ва Apple маҳсулотларини шиддатли рақобатбардош бозорларда ажратиб турадиган тамойилларга таҳдид солади. Даъво тасдиқланса, одамлар Apple’дан кутаётган технологияни яратиш қобилиятимизга тўсқинлик қилади. Биз ушбу даъвони қонун томонлама асоссиз деб ҳисоблаймиз, — деди компания.
Bloomberg қайд этишича, АҚШ Адлия вазирлиги 14 йил ичида учинчи марта Apple компаниясини монополияга қарши қонунларни бузганликда айбламоқда. Март бошида Еврокомиссия Apple компаниясини 1,8 миллиард евро жаримага тортган эди, чунки компания бошқа иловаларни ишлаб чиқувчиларга App Store дўконидан ташқарида арзонроқ мусиқа обунаси хизматлари борлиги ҳақида фойдаланувчиларни хабардор қилишга имкон бермаган.
Изоҳ (0)