Россия президенти Владимир Путин 2024 йилнинг май ойида Хитойга боради. Бу ҳақда манбаларга таяниб, Reuters хабар берди.
Россия президентининг Хитойга эҳтимолий ташрифи ҳақида исми сир қолишини истаган манба маълум қилган. Маълумотни Reuters агентлигининг яна тўрт нафар суҳбатдоши тасдиқлаган. Путиннинг Хитойга ташрифи унинг мамлакат президенти этиб қайта сайланганидан кейинги илк хорижий сафари бўлиши мумкин.
Путиннинг Хитойга сўнгги сафари 2023 йилнинг кузида бўлиб ўтган. Хитой раҳбари Си Цзиньпин 2023 йил март ойида Москвага ташрифи чоғида Россия президентини Пекинга таклиф қилганди. Путин Хитойга ташрифи доирасида “Бир макон, бир йўл” форумида нутқ сўзлаган. Сафар чоғида у икки давлат тенг ҳуқуқли, ўзаро манфаатли ҳамкорликка интилаётганини айтган.
Эслатиб ўтамиз, Россияда 15—17 март кунлари президентлик сайловлари бўлиб ўтганди. Унда амалдаги раҳбар Владимир Путин овозларнинг 99,76 фоизи кўриб чиқилган ҳолатда 87,29 фоиз овоз билан етакчилик қилган. Россия Марказий сайлов комиссияси якуний натижаларни 21 март куни эълон қилишини таъкидлаган.
Изоҳ (0)