Жорий йилнинг 14 январь куни Ўзбекистон президенти Шавкат Мирзиёев Сирдарё вилоятига ташрифи давомида Сайхунобод тумани “Иттифоқ” маҳалласида бўлиб, томорқа ва уй хўжаликлари билан танишганди. Давлат раҳбари Сирдарё вилояти Сайхунобод туманидаги йиғилишда Сайхунободда йўлга қўйилиши режалаштирилаётган янги тажрибани бутун республика бўйлаб қўллашнинг аҳамиятини алоҳида таъкидлаб ўтган эди. Хўш, Сайхунобод тажрибаси қандай вазифа ва мақсадларни ўз ичига қамраб олади?
Ўзбекистон Республикаси президенти ҳузуридаги Стратегик ислоҳотлар агентлигининг маълум қилишича, Сайхунободда 19 та маҳалланинг ҳар бирига 1 тадан мини трактор, 4 тадан мотокултиватор олиб берилган. Эндиликда ҳар бир маҳалладаги ҳоким ёрдамчиси “1 сотих томорқадан камида 1-2 миллион сўм даромад” деган мезон асосида аҳоли учун бизнес режа ишлаб чиқади. Маҳалладаги агрономлар билан бирга олиб берилган техникалар ҳисобидан томорқа ерларини ҳайдаш ва экин экиш хизматларини кўрсатади.
Шунингдек, туманда экспортга кўмаклашувчи корхона очилиб, уставига 1 млрд сўм киритилади. Бу корхона 4 минг хонадонга серҳосил қовоқ, мош, ловия, розмарин, брокколи, тимян уруғини етказади, етиштирилган маҳсулотни сотиб олиб, экспорт қилади.
Бундан ташқари, маҳаллада сотиб олишни йўлга қўйган экспортчи, илғор тадбиркорларга 300 миллион сўмдан 1 млрд сўмгача грант берилади. Хонадонлар кооперация асосида экспортчи билан боғлаб берилади, 2 минг тонналик сақлаш, саралаш ва қайта ишлаш комплекси ташкил этилади. Тумандаги 98 километр каналлар ва дренаж тармоқлари атрофидаги 100 гектар бўш ерлар кооперация асосида 500 та хонадонга терак экиш учун бўлиб берилади.
Сайхунобод тажрибаси ердан янада самарали фойдаланиш, деҳқонлар учун бозор топишга кўмаклашиш, тадбиркорларни сифатли уруғ ва дори воситалари билан таъминлаш, тадбиркорларнинг экспортига амалий ёрдам бериш, ер муносабатларини шакллантириш каби муҳим ислоҳотларни ўз ичига олади.
Изоҳ (0)