Исроил ҳарбийлари 30 минг киши бошпана сақлаётган Ал-Шифо касалхонасини тўлиқ ўраб олди — CNN

18 март куни Исроил ҳарбийлари Ғазо шаҳрининг Ал-Шифо касалхонаси яқинида тўпланган аҳолини эвакуация қилишни буюрди. Бу ҳақда CNN хабар берди.

Ғазо Соғлиқни сақлаш вазирлигининг маълум қилишича, 18 март тонгида 30 000 га яқин киши бошпана топган касалхона Исроил мудофаа кучлари томонидан ўраб олинган. Касалхона ҳудудига ташқаридан кириш тўхтатиб қўйилган.

Исроил мудофаа кучлари Тель-Авивдан касалхонада йиғилганларни тезкор эвакуация қилиш тўғрисида буйруқ олганини маълум қилган. Аҳоли Ғазо анклавининг жанубий қисмига кўчирилиши борасида маълум қилинган.

Хабарда айтилишича, ҳудуд блокада қилиниши билан бир пайтда, касалхона ичида ёнғин юзага келган. Ҳудуд снайпер ва ҳарбий самолётлар нишонига айланиб қолган. Касалхонани тарк этишга уринган ҳар қандай одам ўлим билан таҳдид қилинмоқда.

Исроил кучлари касалхона аҳолиси Ғазо жанубидаги “Ал-Маваси” гуманитар зонасига кўчирилиши тўғрисида маълумот берган.