Туркия президенти Ражаб Тоййиб Эрдўғон Исроилга қурол етказиб бераётганларни кескин танқид қилиб, улар Ғазо секторини қабристонга айлантиришга ҳисса қўшаётганини айтди. Бу ҳақда Anadolu хабар берди.
Исроилнинг хатти-ҳаракатлари унинг америкалик, инглиз, немис, француз ва бошқа ўнлаб тарафдорларининг позициясини акс эттираётганини тушунмайдиганларнинг ақли ва виждонидан ҳайратдамиз, — деди Эрдўғон “Эски дўстлар ифтори”даги сўзлаган нутқида.
Туркия етакчиси барчани рамазон ойи билан табриклар экан, бу сафар муборак ой Ғазо ва ишғол қилинган Фаластин ҳудудларидаги вазият туфайли ғамгин кечаётганини айтди.
Асримизнинг энг шафқатсиз геноцидларидан бири Ғазода бўлиб ўтмоқда, 40 мингга яқин биродарларимиз, асосан болалар ва аёллар ҳалок бўлди, 73 минг фаластинлик яраланди, етти мингдан ортиқ бегуноҳ инсонлар ҳамон вайроналар остида қолмоқда. Исроилни саҳнадан танқид қилган, лекин уни қурол-яроғ ва ўқ-дорилар билан оммавий қотиллик содир этишини қўллаб-қувватлаётган Ғарб давлатларининг иккиюзламачилиги Ғазони болалар ва аёллар учун дунёдаги энг катта қабристонга айлантирди, — деган Эрдўғон.
Унга кўра, халқаро институтлар ва ташкилотлар Ғазода яна муваффақиятсизликка учради. Ислом олами ҳам ўз ишини бажармади ва мусулмонлар бу ҳақда ўйлаши керак.
Ўз-ўзини танқид қилиш билан қанчалик тез шуғуллансак, бу Фаластин халқи ва бутун ислом уммати учун шунчалик яхши бўлишига ишонаман. Туркия оғриқли бўлса ҳам ҳақиқатни гапиришдан ва овозини баландлатишдан тортинмайди, — дея хулоса қилди у.
Изоҳ (0)