Туркия президенти Ражаб Тоййиб Эрдўғон Исроил бош вазири Биньямин Нетаньяхунинг Ғазода содир этган ҳарбий жиноятларини Гитлер бошчилигидаги фашистлар режимининг ҳаракатларига қиёслади. Бу ҳақда у Анқарадаги чиқиши давомида айтиб ўтди.
“Ғазодаги ҳужумлар бошланганидан бери 80 кун ўтди, бу вақт давомида инсониятнинг барча қадриятлари ўққа тутилди. Нетаньяху бугунги кунда содир этган жиноятлари билан Гитлернинг 80 йил олдинги ҳаракатлари ўртасида ҳеч қандай фарқ йўқ”, — деди Эрдўғон.
Туркия президенти Ғазодаги фожиани тўхтатиш учун Ғарб давлатлари етарлича ҳаракат қилмаётганини яна бир бор таъкидлади.
“Германия Гитлер жиноятлари учун ҳамон жавоб бермоқда, шунинг учун улар жим. Ғарбнинг Исроилдан қарзи бор, Туркиянинг қарзи йўқ. Америка Исроилга ҳар томонлама ёрдам бермоқда, бу ёрдам билан Исроил Ғазо аҳолисини ўлдирмоқда”, — дея таъкидлади Эрдўғон.
Аввалроқ у Нетаньяхуни ҳарбий жиноятчи деб атаган ва 3 мингга яқин адвокат Гаагадаги Халқаро жиноий судга Исроил бош вазирини Ғазо секторида содир этаётган ҳарбий жиноятлар учун жавобгарликка тортишни талаб қилиб даъво қилгани ҳақида хабар берган эди.
Изоҳ (0)