Turkiya prezidenti Rajab Toyyib Erdo‘g‘on Isroilga qurol yetkazib berayotganlarni keskin tanqid qilib, ular G‘azo sektorini qabristonga aylantirishga hissa qo‘shayotganini aytdi. Bu haqda Anadolu xabar berdi.
Isroilning xatti-harakatlari uning amerikalik, ingliz, nemis, fransuz va boshqa o‘nlab tarafdorlarining pozitsiyasini aks ettirayotganini tushunmaydiganlarning aqli va vijdonidan hayratdamiz, — dedi Erdo‘g‘on “Eski do‘stlar iftori”dagi so‘zlagan nutqida.
Turkiya yetakchisi barchani ramazon oyi bilan tabriklar ekan, bu safar muborak oy G‘azo va ishg‘ol qilingan Falastin hududlaridagi vaziyat tufayli g‘amgin kechayotganini aytdi.
Asrimizning eng shafqatsiz genotsidlaridan biri G‘azoda bo‘lib o‘tmoqda, 40 mingga yaqin birodarlarimiz, asosan bolalar va ayollar halok bo‘ldi, 73 ming falastinlik yaralandi, yetti mingdan ortiq begunoh insonlar hamon vayronalar ostida qolmoqda. Isroilni sahnadan tanqid qilgan, lekin uni qurol-yarog‘ va o‘q-dorilar bilan ommaviy qotillik sodir etishini qo‘llab-quvvatlayotgan G‘arb davlatlarining ikkiyuzlamachiligi G‘azoni bolalar va ayollar uchun dunyodagi eng katta qabristonga aylantirdi, — degan Erdo‘g‘on.
Unga ko‘ra, xalqaro institutlar va tashkilotlar G‘azoda yana muvaffaqiyatsizlikka uchradi. Islom olami ham o‘z ishini bajarmadi va musulmonlar bu haqda o‘ylashi kerak.
O‘z-o‘zini tanqid qilish bilan qanchalik tez shug‘ullansak, bu Falastin xalqi va butun islom ummati uchun shunchalik yaxshi bo‘lishiga ishonaman. Turkiya og‘riqli bo‘lsa ham haqiqatni gapirishdan va ovozini balandlatishdan tortinmaydi, — deya xulosa qildi u.
Izoh (0)