Тошкент шаҳри ва Тошкент вилоятида табиий газдан ноқонуний фойдаланган иссиқхоналар аниқланди, деб хабар беради Бош прокуратура ҳузуридаги департамент.
Қайд этилишича, департаментнинг Юнусобод туман бўлими томонидан ГТФ ходимлари билан ҳамкорликда терговга қадар текширув ўтказилган. Текширувда фуқаро Ж.К. ва бошқалар тумандаги “Катта Ҳасанбой” МФЙ ҳудудидаги уйда тижорат мақсадида ташкил этилган иссиқхонада резина шланглар ёрдамида умумий фойдаланишдаги табиий газ тармоғига ўзбошимчалик билан уланиб жами 393,7 минг метр куб табиий газни ўғирлаб, давлат ва жамият манфаатларига 590,7 миллион сўм зарар етказгани аниқланган.
Шу каби, департаментнинг Қибрай туман бўлими томонидан ўтказилган терговга қадар текширувда “Т.А.” МЧЖ раҳбари Д.С. МЧЖ иссиқхонасида жами 229,4 минг метр куб табиий газдан ноқонуний фойдаланиб, давлат ва жамият манфаатларига 344,2 миллион сўм зарар етказгани маълум бўлди.
Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)