Асосан фантастика жанрида ижод қилувчи канадалик режиссёр Жеймс Кэмерон “Аватар” фильмининг кейинги қисмларини тезроқ суратга олишни режалаштирмоқда. Режиссёр кекса актёрлар суратга олиш ишлари бошланиш вақтига қадар яшаб қолмаслигидан хавотирда. Бу ҳақда People talk хабар бермоқда.
Айни пайтда фильмнинг учинчи қисми устида ишлар олиб борилмоқда. Франшизанинг тўртинчи ва бешинчи қисми 2029 ва 2031 йилларга мўлжалланган. Фавқулодда вазиятларнинг олдини олиш учун барча актёрларнинг юз кўриниши сканердан ўтказилган. Режиссёр сўзларига кўра, бирор актёр сёмка жараёнида вафот этса, сунъий интеллектдан фойдаланган ҳолда қаҳрамонлар роли давом эттирилади. Бу эса фильм тўхтаб қолмаслигини ва ўз вақтида тақдим этилишини кафолатлайди.
“Жеймс Кэмерон ҳеч кимнинг вафотини кўришни истамайди, лекин Сигурни (74), Стивен (71) ва Мишель (61) (Грэйс, Майалса ва Труди ролларини ижро этган актёрлар — таҳририят) режиссёр сингари қариб бормоқда ва кутилмаганда ҳар қандай иш содир бўлиши мумкин”, — дейилади хабарда.
Эслатиб ўтамиз, “Аватар” фильмининг илк қисми премьераси 2009 йилда, иккинчи қисми эса 2022 йилда бўлиб ўтган.
Изоҳ (0)