12 март куни Польша Мудофаа вазирлиги давлат котиби ўринбосари Станислав Взиатек Варшава ҳар қандай шароитда ҳам Украинага қўшин жўнатмаслиги, ҳатто украиналик ҳарбийларни ўқитиш жараёнларида ҳам қатнашмаслигини маълум қилди. Бу ҳақда “ТАСС” нашри хабар берди.
“Биз аскарларимизни уруш зонасига киритишни режалаштирмаяпмиз, чунки Украинада Польша қўшинларининг мавжуд бўлиши, гарчи у ўқув мақсадларида бўлса ҳам, урушда қатнашиш билан баробар”, — деган мамлакат расмийси.
Аввалроқ Польша ташқи ишлар вазири Радослав Сикорски Франция президенти Эммануэль Макроннинг Украинага қўшин киритиш ҳақидаги ташаббусини юқори баҳолаганини маълум қилганди. Бироқ Польша Мудофаа вазирлиги Варшаванинг Украинага қўшин киритиш нияти йўқлигини бир неча бор таъкидлаган.
Олдинроқ Франция президенти Эммануэл Макрон НАТО иттифоқчилари ўртасида Парижда бўлиб ўтган йиғилишда қуруқликдаги қўшинларни Украинага юбориш имконияти муҳокама қилинганини айтган эди. Франция раҳбарининг сўзларига кўра, бу борада умумий консенсусга эришилмаган, аммо келажакда Украинага НАТОнинг тўғридан тўғри аралашувини истисно этиб бўлмайди.
Изоҳ (0)