Тошкентда уй-жой ижара нархлари кетма-кет иккинчи ой пасайди. Бу ҳақда Иқтисодий тадқиқотлар ва ислоҳотлар марказининг кўчмас мулк бозорида юз берган ўзгаришлар бўйича 2024 йил 12 март куни эълон қилган таҳлилида келтирилган.
Февраль ойида уй-жой ижараси бозорида нархларнинг пасайиши кузатилди. Январь ойида ижара бозори 2,2 фоизга пасайган бўлса, февраль ойида эса 1,1 фоизга пасайиб, 1 квадрат метр учун 8,9 долларни ташкил этди.
Ижара ҳақининг энг катта пасайиши Яшнобод туманида 6,3 фоиз ва Чилонзор туманида 5,7 фоизга қайд этилди. Йиллик ҳисобда ижара ҳақининг энг кўп пасайиши Олмазор, Шайхонтоҳур ва Яккасарой туманларида 13 фоиздан 18 фоизгача қайд этилди.
Нисбатан арзон уй-жой ижараси Учтепа, Сергели ва Бектемир туманларида сақланиб қолмоқда ва квадрат метр учун 6 доллардан 8 долларгача ўзгариб туради.
Бектемир ва Шайхонтоҳур туманларида ойлик ижара ҳақи ошди, бу ерда уй-жойни ижарага олиш мос равишда 3,5 фоиз ва 2,5 фоизга қимматлашди. Шайхонтоҳур, Яккасарой ва Миробод туманларида ижара нархи юқорилигича сақланиб қолмоқда. Бу туманларда уй-жойни ижарага олиш ўртача квадрат метр учун 11 долларга тушади.
Изоҳ (0)