Ўзбекистонда мулкдорлар ҳуқуқларини кафолатли таъминлашга хизмат қилувчи қонун лойиҳаси депутатлар томонидан иккинчи ўқишда кўриб чиқилиб, қабул қилинди.
Янги таҳрирдаги Конституция қабул қилиниши муносабати билан “Ўзбекистон Республикасининг айрим қонун ҳужжатларига ўзгартиришлар ва қўшимча киритиш тўғрисида”ги қонун лойиҳаси билан Уй-жой кодекси ва “Ер участкаларини компенсация эвазига жамоат эҳтиёжлари учун олиб қўйиш тартиб-таомиллари тўғрисида”ги қонунга тегишли ўзгартириш ва қўшимчалар киритиш назарда тутилмоқда.
Жумладан, Уй-жой кодексининг 11-моддасида турар жойларнинг ташқи кўринишини ўзгартириш, уларни қайта қуриш ёки бузиш шаҳарсозлик тўғрисидаги қонунчиликка мувофиқ амалга оширилиши белгиланмоқда. Амалда турар жойларнинг кўринишини ўзгартириш, уларни қайта қуриш ёки бузишга маҳаллий давлат ҳокимияти органларининг тегишли рухсатномаси бўлган тақдирда йўл қўйилар эди.
Шунингдек, ҳеч ким суд қарорисиз ва қонунга зид тарзда уй-жойидан маҳрум этилиши мумкин эмаслиги, уй-жойидан маҳрум этилган мулкдорга уй-жойнинг қиймати ҳамда у кўрган зарарларнинг ўрни қонунда назарда тутилган ҳолларда ва тартибда олдиндан ҳамда тенг қийматда қопланишини таъминлаш белгилаб қўйилмоқда.
Ҳеч ким суднинг қарорисиз ва қонунга зид тарзда уй-жойидан маҳрум этилиши мумкин эмаслиги Янги таҳрирдаги Конституциянинг 47-моддасида мустаҳкамлаб қўйилган эди.
Депутатларнинг қайд этишича, қонун лойиҳасининг қабул қилиниши янги таҳрирдаги Конституция сўзсиз амалга оширилишига, уй-жойидан маҳрум этилган мулкдорга уй-жойнинг қийматини ҳамда у кўрган зарарларнинг ўрнини белгиланган тартибда қоплаш орқали хусусий мулкнинг ҳимоя қилинишини ва мулкдорлар ҳуқуқлари кафолатларини таъминлашга хизмат қилади.
Изоҳ (0)