“Kung-fu panda-4” franshizasi namoyishining ilk kunlaridayoq 58,3 million dollar daromad keltirdi va Amerika kinoprokatida birinchi o‘rinni egalladi. Bu haqda “Pravila jizni” nashri xabar bermoqda.
Yangi animatsion film o‘zining ikkinchi (47,6 million dollar) va uchinchi (41,2 million dollar) qismlaridan ham yuqoriroq ko‘rsatkichga chiqdi va franshiza debyutining muvaffaqiyatiga yaqinlashdi. “Kung-fu panda” multfilmining birinchi qismi 2008-yilda 60 million dollar miqdorda pul ishlab topgan edi.
“Kung-fu panda-4”ning premyerasi 2024-yil 8-mart kuni bo‘lib o‘tdi va multfilm bir vaqtning o‘zida AQSHning 4035 ta kinoteatrida debyut qildi. Asar ko‘proq ommaviy tomoshabinlarga manzur bo‘ldi. Uning reytingi Cinema Score bo‘yicha A ga yetdi.
Universal Pictures kinokompaniyasining mahalliy prokat bo‘yicha prezidenti Jim Orr mazkur oilaviy filmning davomini tomoshabinlar uzoq vaqt davomida intiqlik bilan kutganini ta’kidladi. Shuningdek, jahon kinoprokatida “Kung-fu panda-4” yana 22 million dollar foyda oldi va umumiy hisobda 80 million dollardan ortiq daromadga chiqdi.
Mart oyining boshlarida AQSHda eng ko‘p ko‘rilgan filmlar reytingida ikkinchi o‘rinni “Dyuna-2” filmi egalladi (46 million dollar).
“Xayoliy do‘st” filmi 3118 ta kinoteatrda namoyishi orqali o‘n million dollar foyda oldi va Amerika kinoprokatidagi kuchli uchtalikka kirdi. To‘rtinchi o‘rinni “Kabrini” biografik filmi (7,6 million dollar) va beshinchi o‘rinni “Bob Marli: yagona muhabbat” biografik dramasi egalladi.
Izoh (0)