“Оппенгеймер” фильми режиссёр Кристофер Ноланга 72 миллион доллар фойда келтирди

Америка ва Британия кинорежиссёри Кристофер Нолан “Оппенгеймер” фильми орқали 72 миллион доллар ишлаб топди. Бу ҳақда “Правила жизни” нашри хабар бермоқда.

Фильмдан келган фойда миқдорини Forbes нашри экспертлари ҳисоблади, аммо улар солиқларни инобатга олмаган. Фойда ичига агент ва адвокат тўловлари ҳам киритилган.

Қайд этилишича, Universal Pictures студияси Кристофер Нолан билан “first-dollar gross” шартномасини тузган. Унга кўра, режиссёр “Оппенгеймер” фильми намойиши бошланганда касса тушумларининг 15 фоизини олган.

2024 йилда “Оскар” мукофотлари бўйича мутлақ ғолиб бўлган “Оппенгеймер” фильмининг жаҳон премьераси ўтган йили 21 июль куни бўлганди. Бугунги кунга келиб, фильм 950 миллион доллардан ортиқ даромад келтирди ва тарихдаги энг юқори даромад келтирган биографик фильмга айланди.

Аввалроқ Forbes журнали “Аватар” фильми режиссёр Жеймс Кемеронга 95 миллион доллар даромад келтиргани ҳақида ёзган эди.