Испания миллий полицияси машҳур футболчиларнинг уйларида ўғрилик билан шуғулланган жиноий гуруҳ фаолиятини тўхтатди.
Бу ҳақда қироллик ҳуқуқ-тартибот идораларининг пресс-релизида айтилган.
Уларга кўра, 2022 йил июль ойидан бери ҳашаматли турар жой мажмуаларида саккизта ўғрилик содир этгани тахмин қилинаётган олти киши қўлга олинган.
Гумонланувчилар ўғриликка тушишдан олдин ижтимоий тармоқларда футболчиларнинг оила аъзолари ва яқинлари томонидан жойлаштирилган фотосуратлар ва видеоларни ўрганишган. Кейин эса футбол учрашуви давом этаётган пайтда уйда ҳеч ким бўлмаслигидан фойдаланиб, ўғриликка тушишган.
Тергов 2023 йил май ойида Мадриддаги уйда содир бўлган ўғриликка эътибор қаратди. Ўшанда жиноятчилар 500 минг еврога яқин нарсаларни ўғирлашга муваффақ бўлишганди.
Полиция қурбоннинг исм-шарифини очиқламаган бўлса-да, ўша вақтда Мадриднинг “Реал” ҳужумчиси Родригонинг уйида ўғрилик содир бўлганини эсга олиш мумкин.
Изоҳ (0)