Ispaniyada mashhur futbolchilarning uyiga o‘g‘rilikka tushish bilan shug‘ullanganlar qo‘lga olindi

Ispaniya milliy politsiyasi mashhur futbolchilarning uylarida o‘g‘rilik bilan shug‘ullangan jinoiy guruh faoliyatini to‘xtatdi.

Bu haqda qirollik huquq-tartibot idoralarining press-relizida aytilgan.

Ularga ko‘ra, 2022-yil iyul oyidan beri hashamatli turar joy majmualarida sakkizta o‘g‘rilik sodir etgani taxmin qilinayotgan olti kishi qo‘lga olingan.

Gumonlanuvchilar o‘g‘rilikka tushishdan oldin ijtimoiy tarmoqlarda futbolchilarning oila a’zolari va yaqinlari tomonidan joylashtirilgan fotosuratlar va videolarni o‘rganishgan. Keyin esa futbol uchrashuvi davom etayotgan paytda uyda hech kim bo‘lmasligidan foydalanib, o‘g‘rilikka tushishgan.

Tergov 2023-yil may oyida Madriddagi uyda sodir bo‘lgan o‘g‘rilikka e’tibor qaratdi. O‘shanda jinoyatchilar 500 ming yevroga yaqin narsalarni o‘g‘irlashga muvaffaq bo‘lishgandi.

Politsiya qurbonning ism-sharifini ochiqlamagan bo‘lsa-da, o‘sha vaqtda Madridning “Real” hujumchisi Rodrigoning uyida o‘g‘rilik sodir bo‘lganini esga olish mumkin.