Шаҳрисабз шаҳрининг собиқ аёл ҳокими вафот этди

Қашқадарё вилоятининг Шаҳрисабз шаҳрига раҳбарлик қилган биринчи аёл раҳбар Шодиой Мансурова вафот этди. Бу ҳақда “Дарё”га Муроджон Азимовнинг ўринбосари Комила Каромова хабар берди. 

Комила Каромовага кўра, марҳума 7 март куни 78 ёшида юрак хуружидан оламдан ўтган.

2024 йилнинг 7 март куни Қашқадарё халқи учун оғир йўқотиш бўлди. Вилоят хотин-қизлари орасида биринчилардан бўлиб, шаҳар ҳокими, вилоят хотин-қизлар қўмитасининг раиси бўлиб ишлаган “Мўтабар аёл” кўкрак нишони, “Саломатлик” ордени соҳибаси Шодиой Аслановна Мансурова кутилмаганда, тўсатдан вафот этди, — дейди Комила Каромова марҳумани ёдга олар экан.

1995 йилдан 1998 йилгача Қашқадарё вилояти ҳокими сифатида фаолият юритган Озод Пармоновнинг “Дарё” журналистига билдиришича, марҳума 1988 йил Шаҳрисабз шаҳри ва тумани қўшиб юборилгунга қадар шаҳарда партия қўмитаси биринчи котиби сифатида иш олиб борган.

8 март тантаналарига қатнашиш учун Тошкентга келган эдим. Опа дастлаб қўнғироқ қилганларида яхши етиб келганимни сўради. Сўнгра вилоят тадбирининг қачон ўтишини, бир кунгина қолса ҳам нега таклифномалар ҳалигача тарқатилмаётганидан безовта бўлиб, суриштирдилар. “Нега рўйхатни ўзингиз қилмадингиз, ахир вилоят аёлларини сиздан яхши биладигани ҳам борми?”, дея мени койидилар. “Опа ҳар бир котибиятнинг ўзи рўйхат қиляпти, таклифномани сизга албатта етказишади, Ахир байрам қачон сизсиз ўтган дедим”, кўнгилларини кўтариб. Бу орада Нилуфарга телефон қилиб, таклифномани опага етказишини, шахсан ўзи кутиб олишини тайинладим. Кеч соат 23:00 ларда яна қўнғироқ бўлди. Опа таклифномани олганини билдирди. 

Эрталаб тантанага кирар чоғим, телефонни топширишим керак эди. Кечикмай боришларини ёдларига солай деб опага қўнғироқ қилсам Шаҳноза келин олди. “Опангизни кардиологияга олиб кетишди”, — деди ташвиш билан. Дарров вилоят соғлиқни сақлаш бошқармаси раҳбари Алишер Бобоевга телефон қилдим. Улар билан гаплашиб, телефонни топширар эканман, кўнглим жойига тушгандек бўлди. Алишержон ҳозир ҳаммани оёққа турғазади, насиб бўлса яхши бўлади, опа иродали осонлик билан таслим бўлмайди, енгадилар, деган ишонч ўтди кўнглимдан. Ёнимда кетаётган Ўзбекистон Қаҳрамони Муҳаббат Шаропова ҳам фикримни тасдиқладилар. Аммо, кечга яқин, катта кўтаринки руҳда ўтган тадбирдан руҳимиз баланд чиқар эканмиз, опанинг жанозалари ҳам ўқилганлигини эшитдик. Опа юрак хуружидан дастлабки муолажага ҳам улгурмаган эдилар, — дейди Қашқадарё ҳокими ўринбосари Комила Каромова марҳумани ёдга олар экан.