“Daryo”da Toshkent shahrining Yangihayot tumanidagi ko‘p qavatli uy qurilishida 23 yoshli yigitning boshiga qolip tushib ketishi oqibatida vafot etgani xabar qilingandi. Qurilish va uy-joy kommunal xo‘jaligi vazirligi marhumning o‘limi ehtiyotsizlik ortidan kelib chiqqanini ma’lum qildi. Va buyurtmachi, pudratchi hamda texnik nazoratchilarga qurilish maydonidagi ishchilari uchun xavfsiz sharoitlarni yaratib berishga mas’ul ekanligini yodga soldi.
Ta’kidlanishicha, vazirlik 23 yoshli yigit o‘limi bilan bog‘liq voqeani o‘rganib chiqqan.
Mazkur obyekt Vazirlar Mahkamasining 2022-yil 20-apreldagi 200-sonli qaroriga asosan Toshkent shahar qurilish va uy-joy kommunal xo‘jaligi sohasida hududiy nazorat qilish inspeksiyasi tomonidan o‘rnatilgan tartibda ro‘yxatga olingan. Buyurtmachi New Times Buildings MCHJ Davlat xizmatlari agentligi orqali Toshkent shahar Yangihayot tumani “Yangi darxon” MFY hududida 4 ta 17 qavatli uy-joylar qurilishi uchun ro‘yxatdan o‘tgan. Keyinchalik qurilish ishlari subpudratchi King house MCHJga topshirilgan.
Qurilish-montaj ishlari hududiy inspeksiya xodimlari tomonidan muntazam nazorat qilib borilgan. Xususan, bajarilishi zarur bo‘lgan 10 ta yozma ko‘rsatma berilgan. Biroq ish jarayonidagi ehtiyotsizlik sabab 2024-yilning 11-mart kuni qurilishda ishlab kelayotgan, 2001-yilda tug‘ilgan SH.B.ning boshiga 14-qavatdan qolip-opalubka tushib ketishi natijasida vafot etgan, — deyiladi vazirlik axborotida.
“Daryo” jurnalistining voqea joyiga borib aniqlashtirishicha, ayni paytda hudud o‘rab olingan. Kirib-chiqish to‘xtatilgan.
Vazirlik buyurtmachi, pudratchi va texnik nazoratchilarga qurilish maydonida shu kabi ko‘ngilsiz voqealar kelib chiqmasligi uchun ular ishchilarga xavfsiz sharoit yaratib berishga mas’ul ekanligini eslatgan.
Shu o‘rinda, qurilish obyekti ishtirokchilari, xususan, buyurtmachi, pudratchi va texnik nazoratchilarning qurilish maydonlaridagi ishchilar uchun xavfsiz sharoitlarni yaratib berishga mas’ul ekanliklarini yana bir karra eslatib o‘tamiz. Zero, mehnat muhofazasiga amal qilish bilan sodir bo‘lishi mumkin bo‘lgan har qanday baxtsiz hodisalarning oldini olish mumkin, — deyiladi vazirlik axborotida.
Vazirlik, shuningdek, videorolik taqdim etib, unda qurilish maydonidagi odatiy tartib va qurilish ishlari qay tarzda olib borilishi kerakligi haqida ma’lumot bergan.
Izoh (0)