Ўзбекистон ташқи ишлар вазири Бахтиёр Саидов “Толибон” ҳаракати бош вазири Мулла Муҳаммад Ҳасан Охунд билан учрашувда Ўзбекистон Афғонистонда цемент заводи қуриш, кўмир қазиб олиш ва кўмирдан 200 мегаватт электр энергияси ишлаб чиқариш учун сармоя киритмоқчи эканини айтди.
12 март куни Ўзбекистон Ташқи ишлар вазири ва Ўзбекистоннинг Афғонистон бўйича махсус вакили Мулла Муҳаммад Ҳасан Охунд билан учрашди, деб ёзади “Толибон” бош вазирлиги идораси ўзининг Х ижтимоий тармоғидаги саҳифасида.
Бу учрашувда Ўзбекистон ташқи ишлар вазири Ўзбекистон “Толибон” билан иқтисодий ва қишлоқ хўжалиги лойиҳаларини амалга ошириш бўйича ўз тажрибасини баҳам кўришни исташини айтди.
“Афғон-Транс” темир йўли лойиҳасига тўхталар экан, у Ўзбекистон профессионал делегацияси тез орада ушбу лойиҳани техник ишларини кўриб чиқиш учун Афғонистонга келишини айтди.
“Толибон” бош вазири Ўзбекистоннинг Афғонистондаги лойиҳаларини амалга оширишда ҳамкорлик қилишга тайёрлигини маълум қилган.
Унинг қўшимча қилишича, у “Толибон” идоралари ва расмийларига ушбу лойиҳаларни Ўзбекистон томони билан тўлиқ мувофиқлашган ва ҳамкорликда амалга оширишни буюради.
Ўзбекистон ташқи ишлар вазири Кобулга ташрифи чоғида “Толибон” ҳаракатининг қатор расмийлари, жумладан “Толибон” бош вазири ўринбосарлари Абдул Ғани Барадар ва Абдул Салам Ҳанафий билан ҳам алоҳида учрашди.
Ушбу учрашувларда “Толибон” расмийлари ушбу ҳаракатнинг Ўзбекистон билан алоқаларини кенгайтиришга алоҳида урғу беришди.
Айтиш жоизки, сўнгги икки ярим йил ичида Ўзбекистон “Толибон” ҳаракати билан кенг кўламли алоқаларни ўрнатди, ҳар икки томоннинг турли делегациялари Кобул ва Тошкентга сафар қилиб, турли соҳаларда, айниқса, бизнес соҳасида ўзаро англашув меморандумларини имзолади.
Изоҳ (0)