Ўзбекистонда 2024 йил 1 март ҳолатига кўра, ўзини ўзи банд қилган ҳайдовчилар томонидан жами кўрсатилган хизматлар сони 18,3 миллиондан ошди.
Солиқ қўмитасининг маълум қилишича, такси хизматлари соҳасини легаллаштириш, расмий иш билан банд бўлмаган шахслар фаолиятини қонунийлаштирган ҳолда ушбу бозордаги айланмалар ҳисобини юритиш бўйича бошланган ишлар йил сўнгига бориб ўзининг илк самарасини берди.
Биринчидан, бозорнинг энг катта иштирокчилари солиқ тизимлари билан интеграция қилиниб, такси хизматлари учун фискал чек бериляпти. Иккинчидан, йўловчи ташиш хизмати билан шуғулланувчи ўзини ўзи банд қилган фуқароларнинг расмий даромад манбайи шаклланиб, иқтисодий ҳаракатларда даромад тўғрисидаги маълумотлар ҳисобга олина бошланди (меҳнат стажи, ипотека, истеъмол кредитлари, товарларни бўлиб тўлаш...).
2023 йил декабрь ойида онлайн-такси агрегаторлари орқали 4,4 миллион ташувлар амалга оширилди. Йўловчи ташиш фаолияти 80,1 минг нафар ўзини ўзи банд қилган ҳайдовчи томонидан амалга оширилган. 2024 йил январь ойида қатновлар сони 5 миллионга етди. Ташиш хизматлари 113,5 минг нафар ўзини ўзи банд қилган ҳайдовчи томонидан кўрсатилди.
Февраль ойида бу рақамлар янада ўсди. 2024 йил 1 март ҳолатига ўзини ўзи банд қилган ҳайдовчилар томонидан жами кўрсатилган хизматлар сони 18,3 миллиондан ошди. Шундан 8,9 миллионтаси февраль ойига тўғри келади. Энг юқори айланмага эга шахслар сони 8 446 та бўлиб, битта ҳайдовчига ўртача 8,5 миллион сўмдан тўғри келган.
Нақд ва нақдсиз ҳисоб-китобларда тўловларни фискаллаштириш бўйича ҳамкорликда олиб борилган ишлар натижасида декабрь февраль ойларида бюджетга 9,7 миллиард сўм солиқлар тўланди.
Қўмита бу йўналишда ечимини кутаётган ва охирига етказилиши керак бўлган яна бир қатор масалаларни келтириб ўтди. Хусусан:
- Тошкентда ва ҳудудларда фаолият юритаётган барча маҳаллий ва хорижий онлайн-агрегатор тизимларни интеграция қилиш;
- қисқа рақамлар орқали йўловчи ташиш билан расман рўйхатдан ўтиб ёки ўтмасдан, қонунчилик талабларга тўлиқ жавоб бермайдиган юридик ва жисмоний шахслар фаолиятлини қонунийлаштириш;
- лозим ҳолатларда улардан таклифлар олиниб, фаолиятларини қонунийлаштириш бўйича меъёрий ҳужжатлар лойиҳаси тайёрлаш.
Хабарда таъкидланишича, Ўзбекистонда йўловчи ташиш хизматлари соҳасини легаллаштириш фаол давом эттирилмоқда.
Изоҳ (0)