Рақобатни ривожлантириш ва истеъмолчилар ҳуқуқларини ҳимоя қилиш қўмитаси YandexGo UB’ни бозорда устун мавқега эга компания сифатида тан олди.
Маълум қилинишича, қўмита томонидан йўловчиларни ташиш (такси) учун буюртмаларни жойлаштириш ва такси хизматларини кўрсатишга имкон берувчи воситачилик (агрегатор) хизматлари бозоридаги рақобат муҳити ва тегишли бозор иштирокчилари хўжалик юритувчи субъектларнинг устун мавқеи ўрганилган. Бу 2023 йилнинг иккинчи чорагида (яъни 2022 йил натижалари бўйича барча якуний ҳисоботлар шакллангандан сўнг) бошланган.
Ўрганиш давомида, йўловчиларни ташиш (такси) учун буюртмаларни жойлаштириш ва такси хизматларини кўрсатишга имкон берувчи воситачилик (агрегатор) хизматлари бозорига веб-сайт ёки мобил илова ёрдамида буюртма бериш ҳамда ҳайдовчини топиш имконини берувчи агрегатор хизматлари ва унинг ўрнини маълум даража босувчи телефон орқали диспетчерлик хизматлари бозори ҳам қамраб олинган.
Таҳлил жараёнида республика бўйича жами 66 та фаолият юритаётган хўжалик юритувчи субъект (корхона)дан 58 таси диспетчерлик хизмати ва 8 таси мобил илова орқали агрегатор хизматини кўрсатаётгани маълум бўлган.
Таҳлиллар натижасига кўра, бозор улушлари ва кўрсатилган хизматлари юзасидан фаолият юритаётган хўжалик юритувчи субъектлар ичида энг катта бозор улуши, яъни 86,3 фоизи Yandex Go платформаси ҳиссасига тўғри келиши аниқланган.
Шунингдек, бозорнинг концентрацияси юзасидан мазкур хизмат бозорида саноқли иштирокчилар жами хизматнинг асосий қисмини кўрсатаётганини ва бу бозордаги ҳолат, жумладан, хизмат нархи ва сифатига бир томонлама таъсир кўрсатиш хавфи мавжудлиги ҳам таҳлил жараёнида аниқланган.
Yandex Go иловаси орқали кўрсатилган такси хизматларининг 2022 йилдаги молиявий натижалари юзасидан расмий статистик маълумотлар Ridetech International B.V. компанияси (Нидерландияда рўйхатдан ўтган) томонидан тақдим этилган. 1 декабрдан бошлаб Yandex Go платформасининг агрегаторлик хизматлари Ўзбекистон ҳудудида солиқ резиденти — YandexGо UB МЧЖ юридик шахс томонидан тақдим этилиши эълон қилинди. Ridetech International B.V. компанияси YandexGо UB МЧЖ билан ягона (умумий) иқтисодий манфаатга эга бўлган шахслар ҳисобланиб, шахслар гуруҳи сифатида, бозорнинг ягона субъекти сифатида қаралади.
Юқоридагиларга мувофиқ, 4 декабрь куни қўмита томонидан “Рақобат тўғрисида”ги қонунининг 13-моддасига асосан YandexGо UB МЧЖ йўловчиларни ташиш (такси) учун буюртмаларни жойлаштириш ва такси хизматларини кўрсатишга имкон берувчи воситачилик (агрегатор) хизматлари бозорида устун мавқега эга хўжалик юритувчи субъект деб эътироф этилган.
Изоҳ (0)