11 март куни Бирлашган Миллатлар Ташкилотининг Ғазодаги ёрдам агентлигига қарши айбловлар бўйича терговини олиб бораётган вакил Исроилга келган. Вакил агентликка қарши эълон қилинган даъволарни текшириши хабар қилинган. Бу ҳақда CNN нашри хабар берди.
Франциянинг собиқ ташқи ишлар вазири Кетрин Колонна Бирлашган Миллатлар Ташкилотининг ёрдам агентлиги (UNRWA) таркибидаги 13 нафар асли ғазолик бўлган ходим 7-октябрь куни Исроилга қилинган ҳужумда иштирок этгани ҳақидаги даъво кўтарилгандан сўнг, тергов олиб бориш мақсадида Тель-Авивга келган. Расмий кейинги бир неча ҳафта давомида ҲАМАС билан боғланган БМТ агентлиги аъзолари фаолиятини ўрганиш билан шуғулланади.
Ушбу суриштирув тадбири тўғридан-тўғри БМТ бош котиби Антониу Гутерриш томонидан илгари сурилгани хабар қилинган. Бош котиб БМТ вакиллари орасида текширув ўтказишга рухсат берган.
Аввалроқ Исроил ҳукумати UNRWA агентлиги фаолияти ҲАМАС билан чамбарчас боғлангани, ташкилот ходимлари, асосан, ҲАМАСга хайрихоҳ ғазоликлардан иборат эканини айтган эди. Исроилнинг даъволаридан сўнг UNRWAънинг асосий донори АҚШ ва бир қатор давлатлар 13 мингга яқин киши ишлайдиган ташкилотни молиялаштиришни тўхтатиб қўйган эди.
Изоҳ (0)