Сомалида 1,7 миллионга яқин бола тўйиб овқатланмасликдан азият чекмоқда — БМТ

Сомалидаги қарийб 1,7 миллион бола тўйиб овқатланмайди ва катталарнинг тахминан 40 фоизи шошилинч ёрдамга муҳтож.

Бу ҳақда БМТнинг Озиқ-овқат ва қишлоқ хўжалиги ташкилоти (FAO) директори ўринбосари Бет Бекдол мамлакатга ташрифи якунлари бўйича маълум қилди.

Сомалида яшовчи 7 миллион аҳолидан бу йил ҳар бештадан иккитаси шошилинч тиббий ёрдамга муҳтож. 1,7 миллион бола эса тўйиб овқатланмасликдан азият чекмоқда, — деди у ташрифдан сўнг қилган баёнотида.

Бекдол БМТ бош котибининг гуманитар масалалар бўйича ёрдамчиси ва БМТ Гуманитар масалаларни мувофиқлаштириш бўлимидаги фавқулодда ёрдам координатори ўринбосари Жойс Мсуя билан биргаликда Доллоу қочқинлар лагерида Халқаро хотин-қизлар куни муносабати билан сомалилик аёллар билан учрашди.

Сомалида 2023 йил ноябрь ойида кучли сув тошқинлари юз берди. БМТ маълумотларига кўра, табиий офат 1,6 миллиондан ортиқ одамга зарар етказди. Юз минглаб одамлар ўз уйларини ташлаб кетишга мажбур бўлди, 1,5 миллион гектарга яқин қишлоқ хўжалиги ерлари вайрон бўлди.

Энг хавотирли вазият мамлакат жанубидаги Жубба дарёси водийсида юзага келди. Жабрланган ҳудудларнинг бир қисми ҳукумат томонидан эмас, балки “Ал-Қоида”га алоқадор “Аш-Шабоб” радикал гуруҳи назоратида экани вазиятни мураккаблаштирмоқда.

Сомали табиий офатларга қарши кураш агентлигининг айтишича, у мунтазам равишда “Аш-Шабоб” назоратидаги ҳудудда яшовчи одамлардан қўнғироқларни қабул қилади, бироқ ташкилотнинг у ерда фаолият юритиши имконсиз, чунки бу жуда хавфли.