7 март куни Исроил ҳарбийлари оккупация қилинган Ғарбий Соҳил ҳудудида рейд ўтказиб, 40 нафар фаластинликни ҳибсга олган. Бу ҳақда Anadolu нашри хабар берди.
Хабарда айтилишича, ҳибсга олинганлар орасида тўрт нафар аёл ва бир нафар журналист ҳам бор. Ҳибсга олинганларнинг кўпчилиги Рамаллоҳ, Тулкарм, Наблус, Женин ва Қалқиля шаҳарларида истиқомат қилган.
Фаластин араб нашрлари берган маълумотларга кўра, 2023 йилнинг 7 октябридан бери Ғарбий Соҳилда Исроил кучлари томонидан ҳибсга олинган фаластинликлар сони 7490 нафарга етган. Сўнгги ҳафтада ҳибсга олиш ҳолатлари бир неча маротаба кўпайган.
Ҳарбий амалиётлар давом этаётган Ғазодан фарқли равишда, ҳозирда Ғарбий Соҳил нисбатан анча тинч. Аммо бу ҳудудда Исроил ҳарбийлари доимий рейдлар ўтказиб, тинч аҳолини ҳибсга олиб келиши айтилади. Октябрда ҲАМАС ва Исроил уруши бошлангандан бери Фаластиннинг асосий қисмида ҳам урушга қарши норозилик ҳаракатлари фаоллашган. Бу ҳаракатларни бостиришга уринишлар оқибатида Тель-Авив кучлари Қуддус атрофларида 420 нафар фуқарони отиб ёки калтаклаб ўлдирган. 4 600 нафардан ортиқ киши яраланиб, касалхонага тушгани хабар қилинган.
Изоҳ (0)