Ўзбекисонда 2024 йил бошида 61 та ҳудудда мактабгача таълим ташкилотларига қамров кўрсаткичи пасайган. Бу ҳақда Мактабгача таълим агентлиги ахборот хизмати раҳбари Мавлуда Асқархўжаева маълум қилди.
Унинг билдиришича, 2023 йил давомида мазкур ҳудудларда янги мактабгача таълим ташкилотлари ташкил этилиб, республика бўйича 74 фоизга қамров кўрсаткичи ортганига қарамасдан, 6-7 ёшли болалар мактабга чиқиб кетгандан сўнг уларнинг ўрнини тўлдириш, яратилган янги қувватларга болаларни қабул қилиш, мавжуд бўш ўринлардан самарали фойдаланишда қуйи тизимда мақсадли ишлар амалга оширилмаган.
Болаларни мактабгача таълим ташкилотларига қамраб олиш
- Қорақалпоғистон Республикасининг 9 та туманида 4 213 нафарга;
- Андижон вилоятининг 4 та туманида 2 761 нафарга;
- Жиззах вилоятининг 7 та туманида 1478 нафарга;
- Навоий вилоятининг 1 та туманида 42 нафарга;
- Самарқанд вилоятининг 1 та Каттақўрғон туманида 2,6 фоизга;
- Сирдарё вилоятининг 1 та Янгиер шаҳрида 2,4 фоизга;
- Тошкент вилоятининг 1 та Чиноз туманида 0,3 фоизга;
- Фарғона вилоятининг 11 та туманида 10 427 нафарга;
- Хоразм вилоятининг 4 та туманида 1269 нафарга;
- Тошкент шаҳарнинг 3 та туманида 521 нафарга пасайган.
Шунингдек, кўрсаткичларнинг пасайиб кетиш сабаблари ўрганилганда, ҳудудий бошқармалар ва уларнинг туман (шаҳар) бўлимлари томонидан Мактабгача таълимни бошқариш ахборот тизими (bbit.uz)га сохта маълумотлар киритилиб, болалар сонини сунъий равишда ошириш ҳолатлари кузатилган.
Хусусан, Фарғона вилоятида тизимга киритилган маълумотлар таҳлил қилинганда, Бувайда, Ўзбекистон, Фарғона туманлари, Марғилон, Фарғона, Қувасой шаҳарларидаги 24 та нодавлат мактабгача таълим ташкилотларида 90 нафардан 890 нафаргача болалар белгиланган талабларга зид равишда ташкилот сиғими кам бўлса-да, қувватдан ортиқ қабул қилинган.
Жумладан, Бувайда туманидаги 480 ўринли “Султонбоязид илк қадамлари” хусусий мактабгача таълим ташкилотида 890 нафар, 500 ўринли “Гулибону” хусусий ташкилотида 860 нафар, 510 ўринли “Турдиева Мумтоза Ботировна” хусусий ташкилотида 870 нафар болалар рўйхати киритилиб, туман (шаҳар) ва вилоят қамров кўрсаткичлари сунъий равишда орттирилган.
2023 йилнинг сўнгида Ўзбекистон туманида 2 та гуруҳ (60 ўрин)га мўлжалланган “Ладушки-сладушки” хусусий мактабгача таълим ташкилотига берилган лицензия ҳамда 3 та гуруҳ (90 ўрин)га мўлжалланган “Гулзодахон” номли хусусий мактабгача таълим ташкилотларига берилган лицензия, my.gov.uz тизимида “фаолияти тугатилган” мақомда турганига қарамасдан қуввати сунъий равишда 300 тага оширилган ва болалар билан тўлдирилган.
“Шу билан бирга, ушбу ҳолатларни зудлик билан бартараф этиш мақсадида масъулиясизликка йўл қўйган раҳбарларга чоралар кўрилди, қуйи тизимдаги мавжуд муаммолар яқиндан ўрганилди, жойида ҳал этиш учун ота-оналарга мактабгача таълимнинг афзалликлари тушунтирилди ва натижада қамров даражаси пасайган ҳудудлар 61 тадан 42 тага камайтирилди”, — дейди Мавлуда Асқархўжаева.
Ҳозирда юқорида қайд этилган туман ва шаҳарларда ҳокимлар масъуллигида ўрганишлар олиб борилмоқда.
Изоҳ (0)