Баҳорнинг илк байрами 8 март — Халқаро хотин-қизлар куни арафасида Ўзбекистоннинг барча ҳудудларидаги гул бозорлари-ю гул дўконларида нархлар кескин ошади. Одатий кунларда 8-10 минг сўмга сотилаётган атиргулларнинг донаси байрам арафасида 65 минг сўмдан 80 минг сўмгача, баъзи ҳудудларда эса 100 минг сўмгача ошди. “Дарё” мухбири байрам арафасида пойтахт туманларидаги гул бозорлари ва дўконларида бўлиб, нархни ўрганди.
Дастлаб Яккасарой туманидаги гул бозорида бўлган журналист бир дона атиргул харид қилиш учун 80-90 минг, баъзи дўконларда эса 100 минг сўмгача пул сарфлаш кераклигига гувоҳ бўлди. Одатий кунларда 100-150 минг сўмга сотилган гулдасталар нархи 300-350 минг сўмгача ошган. Атиргуллардан иборат гулдасталар эса 800 минг сўмдан 1 миллион сўмгача, дабдабали кўринишига қараб эса ундан ҳам қимматига ошган.
Чилонзор туманидаги гул бозорида эса 1 дона атиргул кўринишига қараб, 60 минг сўмдан 85-90 минг сўмгача баҳонланмоқда. Атиргуллардан иборат гулдаста ҳам Яккасаройдаги каби 800 минг сўмдан 1 миллион сўмгача ошган.
Байрам куни бўлишига қарамасдан, бизда нархлар унчалик ошмади. Нари борса 30-40 фоизга ошгандир. Одатий кунларда гулдасталаримиз 150-170 минг сўмдан сотилган бўлса, байрам арафасида 230-250 минг сўмга оширилди. Талабга қараб, таклиф қиламиз, — дейди гул сотувчиларидан бири.
Ҳудудда голланд атиргули дея сотилаётган гулларнинг донаси 65-80 минг сўм баҳоланаётган бўлса, голланд лоласи дейилаётган гулларнинг донаси 23-25 минг сўмдан сотилмоқда.
-wiC3kruN.jpg)
Пойтахтнинг Юнусобод туманида жойлашган, халқ тилида “Универсам” бозор деб номланган озиқ-овқат ва деҳқон бозоридаги гулчилар Чилонзор ва Яккасарой туманидаги гулчиларга нисбатан гулларига пастроқ нарх қўйган.
Ушбу бозорда атиргулларни кўринишига қараб 60 минг сўмгача бўлган нисбатан арзон нархда харид қилсангиз бўлади. Лолаларни эса 20 минг сўмдан сотиб олишингиз мумкин.
Мирзо Улуғбек туманидаги “Наврўз” деҳқон ва озиқ-овқат бозоридаги гул бозорида гуллар Чилонзор ва Яккасарой туманидаги гулларга нисбатан анча арзон нархда сотилмоқда.
Ушбу бозордан атиргулнинг донасини 30 минг сўмдан 50 минг сўмгача бўлган нархда сотиб олиш мумкин. Гулдасталар ҳам 150 мингдан 300 минг сўмгача баҳоланмоқда. Атиргуллардан иборат гулдасталар эса 500-600 минг сўмгача сотилмоқда.
Пойтахтдаги савдо дўконларида лолаларнинг донаси 16 минг сўмга ҳам етмаган арзон нархда сотилмоқда. Бироқ бу арзон гулларни доналаб эмас, камида 11 тадан иборат гулдаста ҳолида харид қилишга тўғри келади. Бунинг учун эса камида 175 минг сўм пул тўлаш лозим бўлади.
Ушбу мақолада журналист кузатувлари орқали байрам арафасидаги энг талабгир гуллар ҳақида маълумот берилди.
Изоҳ (0)