Сенегал президенти Маки Салл ҳукуматни тарқатиб юборди ва янги бош вазир тайинлади. Бу ҳақда RTS хабар берди.
Маълум қилинишича, 6 март куни Вазирлар кенгаши йиғилишидан сўнг ҳукумат тарқатиб юборилган.
Сенегал президенти Маки Салл чоршанба куни ҳукуматини тарқатиб юборди ва ички ишлар вазири Сидики Кабуни мамлакатнинг янги бош вазири этиб тайинлади, — дейилади хабарда.
Аввалроқ Сенегал Конституциявий суди мамлакатда президентлик сайловларини 2 апрелдан кечиктирмай ўтказилиши кераклиги ҳақидаги қарори маълум бўлганди. Бунга мамлакатнинг амалдаги раҳбари Маки Саллнинг ваколат муддати тугаётгани сабаб бўлмоқда. Шу тариқа, Сенегалда президентлик сайлови куни 24 март якшанба куни ўтказилиши режалаштирилган.
Дастлаб, Сенегалда президентлик сайловлари 2024 йилнинг 25 февралига белгиланган эди, бироқ давлат раҳбари 3 февралда уларнинг номаълум муддатга қолдирилганини маълум қилди. Ғарбий Африка давлати миллий овоз беришни биринчи марта қолдирди.
Сенегалда сайловлар кечиктирилгани эълон қилинганидан бери норозилик намойишлари тинмаган. Мамлакатда умумий интернет блокланган. Ғарбий Африка Давлатлари Иқтисодий Ҳамжамияти (ECOVAS) Сенегалда президентлик сайловлари қолдирилишидан хавотир билдирган.
Изоҳ (0)