Илзат Касимов президентнинг 6 мартдаги қарори билан инвестициялар, саноат ва савдо вазирининг ўринбосари лавозимига тайинланди. Бу ҳақда вазирлик матбуот хизмати хабар берди.
Шавкат Мирзиёев топшириғига асосан 7 март куни бош вазир раислигида хорижий инвестицияларни жалб қилиш борасида эришилган келишувлар ижросини таъминлаш масалалари муҳокамасига бағишланган видеоселектор йиғилиши ўтказилди.
Бош вазир матбуот хизматининг хабар қилишича, танқидий руҳда ўтган видеоселекторда хорижий давлатлар билан шериклик муносабатларини янада мустаҳкамлаш, эришилган келишувлар ва имзоланган ҳужжатларнинг ижросини сўзсиз ва ўз вақтида таъминлаш ўта муҳимлиги таъкидланди.
Шу мақсадда, давлат раҳбарининг тегишли қарорлари билан Илзат Касимов инвестициялар, саноат ва савдо вазири ўринбосари этиб тайинлангани маълум қилинди.
2023 йил октябрида инвестициялар, саноат ва савдо вазири ўринбосари лавозимида ишлаган Олимхон Рустамов Қашқадарё вилояти ҳокимининг ўринбосари — вилоят инвестициялар, саноат ва савдо бошқармаси бошлиғи лавозимига тайинланганди.
2024 йил январида президент тизимидаги камчиликлар ва сусткашлик учун инвестициялар, саноат ва савдо вазири ўринбосари Бадриддин Абидовни лавозимидан озод қилганди. Ўша ойнинг ўзида “Ўзметкомбинат” бошқаруви раиси биринчи ўринбосари Дилшод Аҳмедов инвестициялар, саноат ва савдо вазири ўринбосари этиб тайинланганди.
Изоҳ (0)