Мисрнинг Arab Nihol Investors қўшма корхонаси Самарқанд вилояти Ургут туманининг тоғолди ҳудудида сайёҳлик мажмуасини қуриш лойиҳасида иштирок этишга қизиқиш билдирмоқда, деб хабар берди “Дунё” АА.
Маълум қилинишича, ушбу қўшма корхона таъсисчиси, мисрлик йирик тадбиркор Аҳмад Зейдан билан музокаралар ўтказилди. Унда Самарқанд вилоятининг Ургут туманидаги тоғолди ҳудудларида 42 гектар ер майдонида сайёҳлик мажмуасини қуриш лойиҳаси муҳокама қилинди.
Лойиҳа қиймати 100 миллион долларни ташкил этиб, у уч босқичда амалга оширилиши режалаштирилган:
- қиймати 18 миллион долларлик дор йўлини қуриш;
- қиймати 32 миллион долларлик 100 ўринга мўлжалланган меҳмонхона қуриш;
- қиймати 50 миллион доллар бўлган 100 ўринли санаторий қуриш.
Таъкидланишича, лойиҳани тўлиқ амалга ошириш учун яна 1000 гектар ер керак бўлади. Унга хориждан, жумладан, Миср ва Уммондан инвесторлар жалб қилинади. Лойиҳа амалга оширилиши натижасида 500 та янги доимий иш ўрни яратилади.
Музокаралар якунида лойиҳани амалга ошириш билан боғлиқ масалаларни Ўзбекистоннинг мутасадди ташкилотлари билан муҳокама қилиш мақсадида алоҳида учрашув ташкил этиш тўғрисида келишувга эришилди.
Изоҳ (0)