Жанубий Корея компанияси Сирдарёда интенсив анор боғи ва тўрт юлдузли меҳмонхона лойиҳасини амалга оширади. Бу ҳақда вилоят ҳокими Акмалжон Махмудалиевнинг Жанубий Кореянинг Evervolution Сo., Ltd компанияси раҳбари Жунг Таегун билан учрашувида таъкидланган.
Вилоят ҳокимлиги матбуот хизматининг хабарига кўра, учрашувда ҳамкорликда амалга оширилиши кўзда тутилаётган янги инвестицион лойиҳалар муҳокама қилинган.
Хусусан, компания томонидан Мирзаобод туманида ўзлаштирилмаган 280 гектар ер майдонда Корея тажрибаси асосида замонавий интенсив анор боғи барпо этиш ҳамда Гулистон шаҳри “Шодлик” маҳалласида тўрт юлдузли меҳмонхона қуриш лойиҳаси ишлаб чиқилган. Компания бунинг учун 10 млн доллардан зиёд сармоя йўналтиришни режалаштирмоқда.
Музокаралар якунида келишув меморандуми имзоланган. Лойиҳаларни амалга ошириш бўйича белгиланган тартибда иш ташкил этилишига келишиб олинган.
Бугуннинг ўзида Evervolution Сo., Ltd компанияси таъсисчилигида Evervolution МЧЖ хорижий корхонаси вилоятимизда давлат рўйхатидан ўтказилган.
Изоҳ (0)