Асаб ва руҳият илмий-тиббий маркази директори, профессор Зарифбой Ибодуллаевнинг айтишича, водий вилоятларининг бирида эпилепсия (тутқаноқ)ни қулоқ ортига укол қилиш орқали даволаш ҳолати халқаро стандартларга тўғри келмайди.
Водий томонда битта невропатолог шифокор эпилепсия касаллигига чалинган беморларни қулоқ орқасига укол қилиб, ўз ёнидан қандайдир кукун билан даволаётгани ҳақида хабарлар тарқалмоқда. Ўша усул билан даволанмоқчи бўлган беморларнинг айтишича, уларда тутқаноқ янада кучайиб, кўпроқ азият чекишган.
Беморларга ҳам, ёш невропатологларга ҳам шуни айтиб қолган бўлардимки, Халқаро эпилептологлар ассоциацияси бор. Уларнинг эпилепсияни даволаш бўйича ишлаб чиқилган схемалари мавжуд. Барча неврологлар эпилепсияни даволашда мана шу схемага амал қилиши керак.
Ўша шифокор ҳам билиб қўйиши керакки, нафақат тиббий жиҳатдан балки, унинг оқибатлари учун юридик жиҳатдан ҳам жавобгарлик бор. Шунингдек, Ўзбекистон соғлиқни сақлаш вазирлиги томонидан ҳам ишлаб чиқилган тартиблар мавжуд. У 40-50 нафар олим томонидан ишлаб чиқиб, тиббий кўрсатма, йўриқнома сифатида тарқатилади. Шифокорлар унга амал қилишлари керак, — деди Зарифбой Ибодуллаев.
Олимнинг қўшимча қилишича, барча касалликлар — инсульт, паркинсонизм, эпилепсияни даволашда олимлар гуруҳи томонидан ишлаб чиқилган жаҳон стандартларига риоя қилиниши лозим.
Маълумот учун, эпилепсия – турли хил хуружлар ва ҳушдан кетиш билан намоён бўлувчи бош миянинг сурункали касаллиги. Ҳар 1000 кишининг 5-10 тасида эпилепсия касаллиги аниқланади. Эпилепсиянинг 70 фоизи 20 ёшгача бўлган даврда ривожланади. Касалланиш даражаси эркак ва аёлларда деярли бир хил.
Изоҳ (0)