Asab va ruhiyat ilmiy-tibbiy markazi direktori, professor Zarifboy Ibodullayevning aytishicha, vodiy viloyatlarining birida epilepsiya (tutqanoq)ni quloq ortiga ukol qilish orqali davolash holati xalqaro standartlarga to‘g‘ri kelmaydi.
Vodiy tomonda bitta nevropatolog shifokor epilepsiya kasalligiga chalingan bemorlarni quloq orqasiga ukol qilib, o‘z yonidan qandaydir kukun bilan davolayotgani haqida xabarlar tarqalmoqda. O‘sha usul bilan davolanmoqchi bo‘lgan bemorlarning aytishicha, ularda tutqanoq yanada kuchayib, ko‘proq aziyat chekishgan.
Bemorlarga ham, yosh nevropatologlarga ham shuni aytib qolgan bo‘lardimki, Xalqaro epileptologlar assotsiatsiyasi bor. Ularning epilepsiyani davolash bo‘yicha ishlab chiqilgan sxemalari mavjud. Barcha nevrologlar epilepsiyani davolashda mana shu sxemaga amal qilishi kerak.
O‘sha shifokor ham bilib qo‘yishi kerakki, nafaqat tibbiy jihatdan balki, uning oqibatlari uchun yuridik jihatdan ham javobgarlik bor. Shuningdek, O‘zbekiston sog‘liqni saqlash vazirligi tomonidan ham ishlab chiqilgan tartiblar mavjud. U 40-50 nafar olim tomonidan ishlab chiqib, tibbiy ko‘rsatma, yo‘riqnoma sifatida tarqatiladi. Shifokorlar unga amal qilishlari kerak, — dedi Zarifboy Ibodullayev.
Olimning qo‘shimcha qilishicha, barcha kasalliklar — insult, parkinsonizm, epilepsiyani davolashda olimlar guruhi tomonidan ishlab chiqilgan jahon standartlariga rioya qilinishi lozim.
Ma’lumot uchun, epilepsiya – turli xil xurujlar va hushdan ketish bilan namoyon bo‘luvchi bosh miyaning surunkali kasalligi. Har 1000 kishining 5-10 tasida epilepsiya kasalligi aniqlanadi. Epilepsiyaning 70 foizi 20 yoshgacha bo‘lgan davrda rivojlanadi. Kasallanish darajasi erkak va ayollarda deyarli bir xil.
Izoh (0)