“Фақат республика марказида бажариладиган нейрожарроҳлик амалиётларининг қарийб 40 фоизи эндиликда барча ҳудудларда бажарилмоқда” - ССВ

Президентимизнинг “Ўзбекистон Республикаси соғлиқни сақлаш тизимини тубдан такомиллаштириш бўйича комплекс чора-тадбирлар тўғрисида”ги фармонига асосан нейрохирургия бўлимлари замонавий техник ускуналар билан таминланган.

Соғлиқни сақлаш вазирлиги ахборот хизматининг “Дарё”га маълум қилишича, 2022 йилда ҳудудларда ўтказилган тиббий кўрикларда 975 нафар бемор аниқланиб, уларнинг 114 нафарида жарроҳлик амалиётлари ўтказилган.

«Бажарилган юқори технологияли амалиётлар улуши 48 фоиз ни ташкил этди (олдинги йилларга таққослаганда кўрсаткич ҳар йил ўртача 5 фоизга ошиб келмоқда).

9 та янги жарроҳлик амалиётлари ўзлаштирилди, шу жумладан эпилепсия, бош мия фалажи, инсултни олдини олиш ва ўткир даврида даволаш, болаларда ретинобластома каби онкологик касаллигини қон томир орқали химиотерапия ўтказиш, бош мия ўсмаларини беморларни уйғоқ ҳолатида ўтказиш ва бошқа турдаги жарроҳлик амалиётлари йўлга қўйилди”, - дейилади вазилик ахборотида.

Қўшимча қилинишича, 58 та ўрин вилоятларда болалар нейрохирургияси учун ажратилган. Шунингдек, тиббий буюмлар ва дори воситалари билан таъминлаш 99 фоизни ташкил етди.

Аввалроқ Ўзбекистонда қарийб 50 турдаги офталмологик касалликларни даволаш йўлга қўйилгани хабар қилинган эди.