Россиянинг НАТО мамлакатларига ҳужум қилиши мумкин бўлган сценарий эълон қилинди. Бу ҳақда Bild хабар берди.
Тегишли сценарийни ўз ичига олган ҳужжат Германия парламентига тақдим этилган. Россия ҳужуми “бутун Европа учун хавфсиз вазиятни тубдан ўзгартириши” таъкидланади. Ҳужжат муаллифларининг фикрича, бундай ҳужум тўрт босқичдан иборат бўлиши мумкин.
Биринчи босқич оммавий ахборот воситалари ва ижтимоий тармоқларда дезинформация кампаниясидан иборат. Москванинг мақсади жамиятни бўлиб ташлаш, уни беқарорлаштириш ва либерал демократияга ишончни сусайтиришдир. Ушбу босқичда киберҳужумлар ва муҳим инфратузилма объектларига: электр узатиш линиялари, тўғонлар ва бошқаларга ҳужумлар бўлиши кутилмоқда. Бунинг ўзига хос хусусияти операцияларнинг махфийлигидадир.
Иккинчи босқич альянс чегараларида рус қўшинларининг йирик манёврларидан иборат. Иттифоқчилар бунга жавобан шарқий чегарада ўз қўшинларини жойлаштиради. Бу илк қочқинларнинг пайдо бўлишига олиб келади. Бу босқич, шунингдек, жосусликнинг кучайиши, саботаж ҳаракатлари, киберҳужумлар — айниқса НАТО қўшинларининг ҳаракатига халақит бериш билан тавсифланади. Космосдаги илк сунъий йўлдошлар ўчириб қўйилиши ҳам мумкин. Германиядаги кимёвий заводлар ва ядро реакторлари каби объектлар нишонга олиниши кутилмоқда.
Учинчи босқич Россиянинг НАТО давлатларига тўғридан тўғри ҳужумини ўз ичига олади. Германия ҳудуди мақсадли зарбаларга дучор бўлади. Бундан ташқари, ҳужжат муаллифлари сунъий йўлдошларнинг оммавий йўқ қилинишини кутмоқда.
Тўртинчи босқичда рус қўшинлари Германия ҳудудига кириб боради, қуруқликда, денгизда ва ҳавода жанглар бўлиб ўтади. Бундан ташқари, космосда глобал миқёсдаги зиддият ривожланади.
Ҳужжат муаллифлари Россия биологик, кимёвий ва тактик ядро қуролидан фойдаланиши мумкинлигини тан олади. Бундан ташқари, улар Россия ердан 50 километр баландликда фаоллаштирилган ва барча электрон қурилмаларни йўқ қила оладиган қандайдир ядровий электромагнит импулсдан фойдаланишидан қўрқади.
Изоҳ (0)