Актёр бўлишни орзу қилган тадбиркор: кинода омади юришмаса-да, аммо бахтини топган Ҳимолай Дассани ҳақида

Болливудда биринчи фильмдан кейиноқ актёрларни унутиш ҳолатлари тез-тез учраб туради. 90 йилларда бундай тақдирлар Кришан Кумар, Притҳви, Файсал Хон ва Ҳимолай Дассани билан содир бўлади. Улар кино саноатида омадларини синаб кўрган, лекин жуда тезда экранлардан ғойиб бўлган.

Салмон Хоннинг яқинда суратга олинган “Кимнингдир укаси, кимнингдир ҳаёти” фильмида Дассани Бҳагяшри билан бирга эпизодик ролда суратга тушди ва бу нафақат “Севиб қолдим” фильми, балки жуфтликнинг машҳур романтикаси ҳақидаги хотираларни ҳам эсга солди. Фильмда эллик ёшли Ҳимолай 90 йиллардаги дебюти билан солиштирганда таниб бўлмас даражада эди. Ўшанда у эндигина 20 ёшдан ошганди, унинг келишган қомати ва узун сочлари ҳар кимнинг ҳавасини келтирарди. Ҳозир эса тўкилаётган сочлар ва ортиқча вазни билан актёрни таниб бўлмасди.

Ҳимолай Дассани 1968 йил 27 ноябрда бадавлат синдхий оиласида туғилган. Бой ишбилармон оиланинг учинчи фарзанди бўлган болакай ҳеч нарсага муҳтож эмасди. Эркатой ўғил мактабга ҳам ўртоқлари билан ўйнаш ва дам олиш учун борарди.

Унинг болаликдаги севгилиси Бҳагяшри Патвардхан билан учрашиши ва у билан турмуш қуриши Болливуднинг ўзига хос блокбастери учун сценарий бўлиши мумкин. Иккаласи бир мактабда ўқиган. Бҳагяшри синф сардори эди ва кўпинча Ҳимолайни тўполончилиги учун жазоларди. Болаликда улар тез-тез жанжаллашиб, уришишарди. Аммо аста-секин улар бир-бирини севиб қолади.

Ўрта мактабни тугатгандан сўнг, иккаласи ҳам бир неча йил танаффус қилишга қарор қилади. Ҳимолай ўқиш учун Америкага кетади, Бҳагяшрига эса Сураж Баржатянинг “Севиб қолдим” (1989) фильмидаги бош ролни таклиф қилишади, қиз рози бўлади. Фильм ўз даврининг блокбастерига айланади, Бҳагяшри бир кечада юлдуз бўлиб уйғонади. Премьерадан сўнг Ҳимолай Ҳиндистонга қайтиб келади ва жуфтлик яна учрашишни бошлайди.

Уларнинг никоҳи ҳам деярли кинолардагидек эди, чунки ёшлар Бҳагяшри оиласининг катта қаршиликларига дуч келади. Тўйда фақат Ҳимолайнинг ота-онаси, режиссёр Сураж Баржатя ва Салмон Хон иштирок этган ибодатхонада бўлиб ўтади. Кино саноати актрисанинг турмушга чиққани ҳақида билгач, Бҳагяшри Болливудни абадий тарк этади деб тахмин қилишади. Бироқ бундай бўлмайди.

Ҳимолай ҳам актёр бўлишни хоҳларди, шунинг учун ўша даврнинг барча йирик продюсерларининг орзуси бўлган ёш рафиқаси унга ёрдам беришга қарор қилади. Актриса эри Ҳимолай унинг партнёри бўлиши шарти билан Болливудда ишлашни давом эттиришини айтади.

Эр-хотин биргаликда бир нечта фильмлар учун шартнома имзолайди ва уларнинг биринчи чиқиши 1992 йил бошида “Қафасдаги булбул” фильми бўлади. Кино бошланишидан аввал экранда шундай титрлар чиқарди: “Болливуднинг янги юлдузи — Ҳимолай билан танишинг!”. Томошабинлар, албатта, Бҳагяшрининг эри кимлигини ва у роль ижро эта оладими ёки йўқми билишга қизиқади.

“Қафасдаги булбул” оддий мелодрама бўлиб, унда Ҳимолай ўзининг ҳақиқий турмуш ўртоғи билан ишқий муносабатда бўлиб, кўплаб жангари саҳналарни ўйнайди. Афсуски, фильм танқидчиларнинг салбий баҳоларини олади. Уларга, айниқса, бош қаҳрамон ёқмайди. Томошабинлар ҳам фильмни томоша қилмайди ва у кассада муваффақиятсизликка учрайди.

Шу йилнинг ўзида яна иккита фильм экранларга чиқади — бу жуфтлик иштирокидаги “Тяги” ва “Паял” картиналари эди. Иккала фильм ҳам кассада тўлиқ омадсизликка учрайди ва бир ҳафталик прокатдан сўнг кинотеатрлардан олиб ташланади.

Шундан сўнг Ҳимолай Болливудда қиладиган иши йўқлигини тушунади. У актёрлик билан хайрлашиб, бор эътиборини бизнесига қаратишга қарор қилади. Айтганча, у бизнес юритишда жуда омадли тадбиркор эди. Янги минг йилликда Ҳимолай кино ва телевидениега сармоя киритишга қарор қилади ва Shrishti Entertainment компаниясига асос солади.

2002 йил ноябрь ойида у телесериаллар ишлаб чиқаришни бошлайди, шу жумладан, бюджети 5 миллион крор бўлган ва рафиқаси Бҳагяшри машҳур қаҳрамон Арти ролини ўйнаган “Қоғоз қайиқ” сериали экранларга чиқади.

Ҳимолай ва Бҳагяшрининг икки фарзанди бор — ўғли Абҳиманю ва қизи Авантика. 2018 йилда уларнинг ўғли Болливуддаги дебютини “Оғриқни ҳис қилмайдиган одам” фильмида қилди. 2022 йилда қизи Авантика “Ёлғон” (2022) веб-сериалида илк марта роль ўйнади.

Беш йил олдин уларнинг оиласи қийинчиликка дуч келади. Ҳимолай қимор ўйинларига алоқадорликда гумонланиб, ҳибсга олинади. Кейин Бҳагяшри бу ҳақда Twitter’да ёзади ва эрини тўлиқ қўллаб-қувватлайди. Яхшиямки, Дассани дарҳол гаров эвазига озод қилинади. Ҳимолай 1992 йилдан бери катта экранда кўринмайди, бундан аввал у рафиқаси билан “Ақлли жуфтлик” (2022) телесериалида иштирок этганди.

Охир-оқибат рафиқасининг ҳамкасби Салмон Хон эпизодик ролда бўлса ҳам Ҳимолайни яна экранларга олиб чиқишга муваффақ бўлди. У рафиқаси ва ўғли билан “Бировнинг укаси, бировнинг ҳаёти” фильмида суратга тушган саҳна эса кинотеатрларда катта мақтовга сазовор бўлди. Буни ностальгия дейиш мумкин.