Алексей Навальний билан оммавий видолашув шу ҳафта охирига режалаштирилган ва мухолифатчининг сафдошлари уни ўтказиш мумкин бўлган жойни қидирмоқда. Бу ҳақда 26 февраль, душанба куни Навальнийнинг матбуот котиби Кира Ярмиш маълум қилган, деб хабар берди DW.
“Биз Алексей билан шу ҳафта охирида ўтказиладиган оммавий видолашув учун жой қидиряпмиз. Агар сизда мос жой бўлса, биз билан боғланинг”, — деб ёзган Ярмиш Х ижтимоий тармоғида.
Аввалроқ бир қанча Telegram каналлари ҳам мухолифатчининг дафн маросими 29 февралга белгилангани ҳақида хабар берган эди.
Коррупцияга қарши курашиш жамғармаси директори Иван Жданов бу хабарларни ёлғон деб атаган. “29 февралдаги дафн маросими ва баъзи каналларимиздаги дафн маросими ҳақидаги барча маълумотлар сохта. Юлия Навальнаянинг Telegram’даги баъзи каналлари каби бу ҳам сохта”, — деб ёзган у Telegram’даги саҳифасида.
Алексей Навальнийнинг ўлими ҳақида 16 февраль куни Ямало-Ненец автоном округидаги 3-сонли ахлоқ тузатиш колонияси маълум қилган. Сиёсатчининг жасади онаси Людмила Навальнаяга фақат 24 февраль куни берилган. Бундан олдин терговчилар уни шантаж қилиб, яширин дафн маросимини ўтказишни талаб қилган эди.
Изоҳ (0)