Ер юзида яшовчи 650 миллионга яқин аёл 18 ёшга тўлмасдан эрта турмушга чиққани маълум бўлди.
UNICEF’нинг талқинига кўра, эрта никоҳ бу — 18 ёшга тўлмаган шахс билан расман тузилган никоҳ ёки норасмий иттифоқ саналади. Ташкилотнинг сўнгги маълумотларига мувофиқ, Ер юзида яшовчи 650 миллионга яқин аёл 18 ёшга тўлмасдан эрта турмушга чиққан.
Эрта никоҳ айниқса Африка мамлакатларида, жумладан, Нигер, Чад, Эфиопия, Танзания каби давлатларда кенг тарқалган. Осиё давлатларида ҳам бу урф-одат кўп кузатилади. Масалан, Бангладешда 13 ёшда турмушга чиқиш бу ернинг аҳолиси учун ғайриоддий ҳолат саналмайди. Расмий маълумотларга асосан бу давлатда 38 миллион қиз 18 ёшга тўлмасидан, ундан 13 миллионга яқини эса 15 ёшга тўлмасидан турмуш қуради.
Ҳиндистонда қонуний никоҳ ёши қизлар учун 18 ёш бўлиб, қонунни бузиш учун 2 йилгача қамоқ жазоси белгиланган бўлса-да, Ҳиндистонда ҳар йили ўртача 2 минг нафардан ортиқ эркак бу жиноят учун озодликдан маҳрум қилинади. Индонезияда қизлар 16 ёшдан, ўғил боллар эса 19 ёшдан оила қуриши мумкин. Мазкур давлатда йилига тахминан вояга етмаганларнинг 64 мингдан ортиқ никоҳи қайд этилади.
Туркияда эса 2023 йилда 16-17 ёшдаги 10 471 нафар қиз эрта турмуш қурган. Туркия қонунларига кўра, никоҳланишнинг ёш чегараси 2022 йилда 18 этиб белгиланган. Бироқ ота-она розилиги билан 17 ёшга пасайтирилиши мумкин.
Ўзбекистонда 2019 йилдан бошлаб эркак ва аёллар учун ягона никоҳ ёши 18 ёш этиб белгиланган. Бундай қатъий чегара ўзининг самарасини берди ва кўплаб эрта никоҳ ҳолатларига қонунан чек қўйди. Таъкидланишича, 2018 йилда республика бўйлаб 5123 та эрта никоҳ ҳолати қайд этилган бўлса, 2023 йилга келиб эрта никоҳлар сони фақат 42 танигина ташкил этган.
Изоҳ (0)