Ўзбекистоннинг қайси ҳудудида никоҳдан ажралишлар сони энг кўп бўлгани очиқланди

Мамлакатда 2023 йилда никоҳдан ажралишлар сони 2022 йилдагига нисбатан кўпроқ бўлди. Бу ҳақда Статистика агентлиги маълум қилди.

Агентлик таҳлилига кўра, ўтган йилнинг январь декабрь ойларида жами 49 200 та оила никоҳдан ажрашган. Шундан 29,9 минг оила шаҳар, 19,3 мингтаси қишлоқ аҳолисидир.

Бунда фарзандсиз никоҳдан ажралишлар сони 24 576 тани (жами кўрсаткичнинг 50 фоизи), бир нафар фарзанд билан ажралишлар 13 610 тани (27,7 фоиз), икки ва ундан ортиқ фарзанд билан никоҳдан ажралишлар 11 12 тани (22,3 фоиз) ташкил этган.

Никоҳдан ажрашган эркаклар ўртача 37,2 ёш, аёллар эса 32,8 ёш бўлган. Энг катта улуш 35 ёшгача бўлган ажралаётган аёллар ҳиссасига тўғри келган, яъни мазкур ёшдагилар жами никоҳдан ажрашганларнинг 62,5 фоизини ташкил этган.

Никоҳдан ажралишларнинг ўсиш суръати энг юқори даражаси Андижон, Хоразм, Фарғона, Навоий ва Сурхондарё вилоятларида кузатилган.

2023 йилда никоҳдан энг кўп ажралганлар Тошкент шаҳрида қайд этилган — 6 169 та. Кейинги юқори кўрсаткичлар Фарғона (5 773 та) ва Андижон (5 480 та) вилоятларида кузатилган.

Маълумот учун, 2020 йилда республикада никоҳдан ажралишлар сони 28 200 тани, 2021 йилда 39 300 тани, 2022 йилда 48 700 тани ташкил этган.