Январь–сентябрь ойларида Тошкент шаҳрида бошқа ҳудудларга нисбатан энг кўп никоҳдан ажралишлар (4 минг 626 та) қайд этилган. Бу ҳақда Статистика агентлиги маълумот берди.
Ўзбекистонда 2023 йил январь–сентябрь ойларида никоҳдан ажралишлар сони 37,7 мингтани ташкил этиб, 2020 йилнинг мос даврига нисбатан 17,7 мингтага кўпайди. Ажралишлар шаҳар жойларида 22,7 мингтани (60,3 фоиз), қишлоқ жойларида 15 мингтани (39,7 фоиз) ташкил этди.
Ўтган 9 ой давомида бир нафар фарзанд билан никоҳдан ажралишлар сони 10 минг 229 тани (27,2 фоиз), икки ва ундан ортиқ фарзанд билан никоҳдан ажралишлар 8 минг 331 тани (22,1 фоиз) ташкил этган. Фарзандсиз никоҳдан ажралишлар сони 19 минг 94 та (50,7 фоиз) бўлган.
Никоҳдан ажрашганларнинг ўртача ёши эркаклар учун 37 ёшни, аёллар учун 32,9 ёшни ташкил этган. Бунда энг катта улуш (62,3 фоиз) 35 ёшгача бўлган ажралаётган аёллар ҳиссасига тўғри келган.
Никоҳдан ажралишларнинг энг юқори ўсиш суръати Хоразм, Андижон, Фарғона, Жиззах ва Наманган вилоятларида кузатилган. Ўсишнинг паст даражаси эса Самарқанд, Сирдарё, Қорақалпоғистон, Бухоро ва Қашқадарёда қайд этилган.
Тўққиз ой давомида никоҳдан ажралишлар сони энг кўп ҳудуд Тошкент шаҳри ( 4 минг 626 та) бўлган. Шу билан бирга, Фарғона ва Андижон вилоятлари ҳам бошқа ҳудудларга нисбатан юқори даражада қайд этилган. Энг кам ажралишлар эса Навоий вилоятида (1 минг 109 та) кузатилган.
Изоҳ (0)