Россия босқинининг бошидан бери 31 минг украиналик аскар ҳалок бўлди. Украина президенти Владимир Зеленский илк бор қуролли кучлар сафидаги йўқотишлар сонини очиқлади. Бу ҳақда Deutsche Welle хабар берди.
“Ушбу урушда 31 минг украиналик аскар ҳалок бўлди. Путин ва унинг ёлғон доиралари гапирганидек 300 минг эмас, 150 минг эмас. Лекин бу йўқотишларнинг ҳар бири биз учун катта йўқотиш”, — деди Зеленский.
Президент ярадор украиналик аскарларнинг сонини айта олмаслигини, чунки Россия бу орқали қанча одам “жанг майдонини тарк этганини” билишини қўшимча қилди. Шунингдек, Зеленский бедарак йўқолган ҳарбийлар сонини ҳам айтмади, бироқ рус ҳарбийларининг йўқотишлари 180 минг эканини таъкидлади.
“Жами ярадорларни ҳисобга олган ҳолда бу рақам 500 минг кишини ташкил этади”, — деди у.
Украина расмийлари ҳарбий сирларга асосланиб, уруш бошланганидан бери ҳеч қачон қурбонлар сонини ошкор қилмаган. Россия ҳам бу маълумот билан бўлишмаган.
Урушдаги йўқотишлар бўйича учинчи томон ҳисоб-китоблари
Россиянинг Украинага бостириб кириши бошланганидан бери қанча ҳарбий хизматчи ҳалок бўлгани маълум эмас. АҚШ Марказий разведка бошқармаси бошлиғи Уилям Бернс 30 январь куни Россия армиясининг умумий йўқотишларини 315 минг кишига баҳолаганди. Бу рақамга яраланган аскарлар ҳам киради.
Эcономист журнали Америка расмийларининг ҳисоб-китобларига таяниб, уруш пайтида камида 70 минг украиналик аскар ҳалок бўлгани ва 120 мингга яқини яраланганини ёзган.
Тhе New York Times 2023 йил август ойида АҚШ маъмуриятига таяниб, Россиянинг 120 минг ҳарбийси ўлгани, 170-180 минги яраланганини маълум қилганди. Украина йўқотишлари 70 мингни ва ярадорлар эса 120 мингни ташкил этиши хабар қилинган.
BBCга кўра, Россия армияси сафида ҳалок бўлган ўзбекистонликлар сони 47 кишини ташкил қилади. Аксар мигрантларни “махсус ҳарбий операция”да қатнашгандан сўнг Россия фуқаролигини соддалаштирилган ҳолда олиш истиқболлари жалб қилади. Баъзилар босим остида армияга ёзилади.
Изоҳ (0)