Украина президенти Владимир Зеленский 2019 йил декабрь ойида Парижда Россия президенти Владимир Путин билан учрашуви ҳақида гапирди. Бу ҳақда “Украинская правда” хабар берди.
Матбуот анжуманида Зеленскийдан 2019 йил Парижда Франция президенти Эммануэл Макрон ва ўша пайтдаги Германия канцлери Ангела Меркель билан учрашув чоғида Россия президенти билан юзма-юз учрашувини эсга олиш сўралган.
“Биз турли оҳангларда узоқ суҳбатлашдик. Мен унга Минск келишувлари иш бермаслигини айтдим, чунки қўшинларни тўқнашув чизиғи бўйлаб олиб чиқиш тематикасининг ўзи ишламайди... Мен унга: қара, қанча вақтда олиб чиқиб кетдик, дея кўрсатдим. Кейин 20 йил олиб чиқишимизни айтдим, яъни биз 20 йил давомида музлатилган конфликт ҳолатида бўламиз, яъни уруш тугамайди, биз шу ҳақда гаплашдик. Бу борада узоқ баҳслашдик.
Кейинги суҳбат газ, биз ютган суд масаласида бўлди, лекин улар ғалаба қозонилган жараёнларга қандай муносабатда бўлишларини биласиз. Бизга пул беришга рози бўлишди, кейин биз пулни олдик.
Учинчи савол эса алмашинув ҳақида эди. Ўшанда биз 100 дан ортиқ одамни алишдик. Тўғриси, у тинимсиз ўт очишни тўхтатиш масаласини кўтарди. Аммо бу қандай ишлашини кейинроқ гувоҳи бўлдик”, — деб эслайди сиёсатчи.
Шунингдек, Зеленский учрашувнинг барча тафсилотларини яхши эслай олмаслигини айтиб, чунки “бу бошқа ҳаётда, бошқача бўлгани”ни билдирди. Бироқ президент “буларнинг барчаси жуда узоқ вақт давомида содир бўлган”, дея қўшимча қилди.
Изоҳ (0)