Ўзига тўқ, автомашинаси бор, доимий даромадга эга 550 минг оила кам таъминланганлар тоифасидан чиқарилди. Бу ҳақда Ижтимоий ҳимоя агентлиги матбуот хизмати “Дарё”га хабар берди.
Давлат раҳбари раислигида 20 февраль куни бўлиб ўтган видеоселектор йиғилишида ижтимоий хизматни ташкил этиш, ҳимояга ҳақиқий муҳтожларни аниқлаш тизими бўйича бошланган ислоҳотлар давом эттирилиши маълум қилинди.
Маълум қилинишича, бир неча йиллар давомида “Сабез” тизими бюджет пулини фуқароларга тарқатиш билан шуғулланган. Мазкур тизим ўзини оқламади. Маълум бўлишича, тизим одамларнинг дардига малҳам бўлиш ўрнига, соҳадаги ташкилотлар қоғозбозлик билан банд бўлган. Шунингдек, миллиардлаб маблағлар шунчаки тарқатиб келинган. Эски тизим одамларга умид бериб, ўсишига кўмаклашиш ўрнига, уларни фақат нафақа олишга ўргатиб қўйган.
Қайд этилишича, биргина кам таъминланган оилаларни аниқлаш мезонларини ишлаб чиқиш, тизимни шаффоф қилиш ҳисобига, 550 минг ўзига тўқ, автомашинаси бор, доимий даромадга эга оила бундай тоифадан чиқарилган. Натижада бюджетдан йилига 2,5 трлн сўм асоссиз харажатнинг олди олинган.
1 июндан ижтимоий ҳимояга муҳтож аҳолини аниқлаш тартиби ва улар билан ишлаш тизими ўзгаради:
- эҳтиёжманд тоифани белгилаш бўйича аниқ мезонлар ишлаб чиқилади ва ижтимоий ҳимояга муҳтож деб топилган ҳар бир аҳоли идентификация қилинади;
- уларнинг ҳар бири бўйича индивидуал ижтимоий хизматлар дастури бўлади.
Ҳар бир савол бўйича одамнинг ўзи нима қилгани, маҳалла қандай ёрдам кўрсатгани, хонадонда нима ўзгаргани мониторинг қилинади. Маҳалладаги барча ижтимоий хизматларни босқичма-босқич ижтимоий хизмат кўрсатиш шартномаси орқали тақдим этиш йўлга қўйилади. Бунда, хизмат кўрсатувчи ҳам, ёрдам олувчи ҳам ўзига мажбурият олади.
Изоҳ (0)