Статистика агентлиги Ўзбекистон ташқи савдо айланмасидаги топ-10 давлатларни эълон қилди.
Агентликнинг дастлабки маълумотларига кўра, 2024 йилнинг январь ойида Ўзбекистоннинг ташқи савдо айланмаси 4,2 миллиард АҚШ долларига етган. Мамлакат ташқи савдо айланмасида юқори улушга эга бўлган ҳамкор давлатлар (АҚШ долларида):
- 27,2 фоиз билан Хитой – 1,1 миллиард, экспорт — 185 миллион, импорт — 956 миллион доллар;
- 18,3 фоиз билан Россия – 767 миллион, экспорт — 240 миллион, импорт — 526миллион доллар;
- 6,5 фоиз билан Қозоғистон – 271,2 миллион, экспорт — 76,3миллион, импорт — 194,9 миллион доллар;
- 5,1 фоиз билан Туркия – 213,9 миллион, экспорт — 83,4 миллион, импорт — 130,5 миллион доллар;
- 4,3 фоиз билан Корея – 180,2 миллион, экспорт — 3,3 миллион, импорт — 176,9 миллион доллар;
- 2,3 фоиз билан Германия – 96,3 миллион, 5,5 миллион, импорт — 90,8 миллион доллар;
- 2,2 фоиз билан Япония – 90,3 миллион, 1,3 миллион, импорт — 89 миллион доллар;
- 1,9 фоиз билан Франция – 78,3 миллион, 66,8 миллион, импорт — 11,5 миллион доллар;
- 1,6 фоиз билан Ҳиндистон – 67,6 миллион, 3,4 миллион, импорт — 64,2 миллион доллар;
- 1,5 фоиз билан Чехия – 64 миллион, 4,3 миллион, импорт — 59,7 миллион доллар.
Ташқи савдо айланмаси ҳажми 2023 йилнинг мос даври билан солиштирилганда 870,1 миллион долларга ёки 17,2 фоизга камайган. Ўзбекистон 2024 йилнинг январь ойида жаҳоннинг 137 та мамлакати билан савдо алоқаларини амалга оширган.
Ўтган ойда экспорт 1,1 миллиард долларга (-47,1 фоиз) етган бўлса, импорт 3,1 миллиард долларни (+4,1 фоиз) ташкил этган. Салбий салдо — 1,9 миллиард доллар.
Январь ойида президент мамлакатдаги экспорт ҳолатини танқид қилганди
Шавкат Мирзиёев раислигида январь ўрталарида экспорт, инвестиция ва маҳаллий саноатда 2024 йилда турган вазифалар бўйича йиғилиш ўтказилганди. Ўшанда президент бевосита инвестиция, саноат ва экспортга масъул 11 та вазирлик ва идора, 10 та уюшма, хориждаги дипломатик ваколатхоналар, бундан ташқари, барча вазирлик, тармоқ ва ҳудудларда экспорт ва инвестицияга масъул раҳбар ўринбосари фаолият юритаётган инвестициялар ва ташқи савдо тизимининг фаолияти жуда сустлигини кўрсатиб ўтган эди.
Шунингдек, йиғилишда ҳозирги мураккаб вазиятда тизимда инвестиция ва экспорт бўйича чуқур таҳлил йўқлиги танқид қилинган. Мамлакатда экспортни кредитлашга 200 миллион доллар ресурс берилган, бундан ташқари, бу йил экспортчиларни қўллаб-қувватлашга 800 миллиард сўм йўналтирилмоқда. Президент Экспорт агентлиги экспортчиларга ҳақиқий кўмакчи бўлиш ўрнига давлатдан берилган тайёр пулни йўналтирадиган “бухгалтер-кассир”га айланиб қолганини танқид қилган эди.
Ундан олдинроқ эса давлат раҳбари иқтисодий комплексдаги ўринбосарлар сонини 15 фоизга қисқартириш бўйича таклиф киритишга топшириқ берганди. Бунда ҳар бир туманда, вилоятдаги иқтисодий комплекснинг раҳбар ва ўринбосарлари ҳамда 11 та вазир ва идора раҳбарлари ҳамда уларнинг ўринбосарларига масъулияти ва жавобгарлиги аниқ белгилаб берилади. Сўров ҳам шунга яраша қаттиқ бўлади.
Изоҳ (0)