O‘ziga to‘q, avtomashinasi bor, doimiy daromadga ega 550 ming oila kam taʼminlanganlar toifasidan chiqarildi. Bu haqda Ijtimoiy himoya agentligi matbuot xizmati “Daryo”ga xabar berdi.
Davlat rahbari raisligida 20-fevral kuni bo‘lib o‘tgan videoselektor yig‘ilishida ijtimoiy xizmatni tashkil etish, himoyaga haqiqiy muhtojlarni aniqlash tizimi bo‘yicha boshlangan islohotlar davom ettirilishi maʼlum qilindi.
Maʼlum qilinishicha, bir necha yillar davomida “Sabez” tizimi byudjet pulini fuqarolarga tarqatish bilan shug‘ullangan. Mazkur tizim o‘zini oqlamadi. Maʼlum bo‘lishicha, tizim odamlarning dardiga malham bo‘lish o‘rniga, sohadagi tashkilotlar qog‘ozbozlik bilan band bo‘lgan. Shuningdek, milliardlab mablag‘lar shunchaki tarqatib kelingan. Eski tizim odamlarga umid berib, o‘sishiga ko‘maklashish o‘rniga, ularni faqat nafaqa olishga o‘rgatib qo‘ygan.
Qayd etilishicha, birgina kam taʼminlangan oilalarni aniqlash mezonlarini ishlab chiqish, tizimni shaffof qilish hisobiga, 550 ming o‘ziga to‘q, avtomashinasi bor, doimiy daromadga ega oila bunday toifadan chiqarilgan. Natijada byudjetdan yiliga 2,5 trln so‘m asossiz xarajatning oldi olingan.
1-iyundan ijtimoiy himoyaga muhtoj aholini aniqlash tartibi va ular bilan ishlash tizimi o‘zgaradi:
- ehtiyojmand toifani belgilash bo‘yicha aniq mezonlar ishlab chiqiladi va ijtimoiy himoyaga muhtoj deb topilgan har bir aholi identifikatsiya qilinadi;
- ularning har biri bo‘yicha individual ijtimoiy xizmatlar dasturi bo‘ladi.
Har bir savol bo‘yicha odamning o‘zi nima qilgani, mahalla qanday yordam ko‘rsatgani, xonadonda nima o‘zgargani monitoring qilinadi. Mahalladagi barcha ijtimoiy xizmatlarni bosqichma-bosqich ijtimoiy xizmat ko‘rsatish shartnomasi orqali taqdim etish yo‘lga qo‘yiladi. Bunda, xizmat ko‘rsatuvchi ham, yordam oluvchi ham o‘ziga majburiyat oladi.
Izoh (0)