Дўконга чиқишга шошилманг: идиш ювиш воситаларининг ўрнини босадиган 7 та табиий маҳсулот

Бугунги кунда маиший кимё бозорида турли хил идиш ювиш воситалари мавжуд. Дўконлар хушбўй ҳидли гелдан тортиб кучли ишқорли кимёвий воситаларга тўла. Аммо шундай вазиятлар бўладики, уйингизга кутилмаган меҳмон ташриф буюради ва идиш ювиш воситангиз аксига олиб тугаб қолган бўлади. Бундай ноқулай вазиятда хонадонингизда мавжуд бошқа воситалардан фойдаланишингиз мумкин. Қуйида уларни кўриб чиқамиз.

Истеъмол содаси

Авваллари замонавий идиш ювиш воситалари бўлмаган вақтларда уй бекалари истеъмол содасидан фойдаланган. Сода билан ювилган чинни идишлар яхши оқаради.

Кир совун

Вирусларга қарши кучли антибактериал хусусиятларга эга хавфсиз ва тоза маҳсулот бўлган кир совун ҳар бир хонадонда топилади. Унинг таркибидаги ишқор идиш-товоқларни нафақат яхши тозалайди, балки дезинфекция ҳам қилади.

Хантал

Қуруқ хантал идишларни тозалашда самарали воситадир. Уни турли усулда қўллаш мумкин. Масалан: бир-икки чой қошиқ кукунни илиқ сувда эритиб, идишларни шу сувда бир неча дақиқага қолдиринг ва оддий сувда ювиб ташланг. Идишларни хантал билан ювишда резина қўлқоп кийишни унутманг, чунки хантал кукуни терини куйдириб юбориши мумкин.

Сирка

Олма сиркаси ёғни қисқа вақтда тозалайди, идишларни оқартиради, товадаги қотиб қолган ёғлардан халос этади ва микробларни йўқ қилади. Сирка ҳеч қандай махсус тайёргарликни талаб қилмайди. Губкани сирка билан намланг ва ювишни бошлайверинг, сўнг тозаланган идишларни қуруқ сочиқ билан артиб олинг. Сиркадан сўнг қоладиган ўткир ҳиддан ташвишланманг — ҳид бир неча соат ичида “учиб кетади”.

Лимон кислотаси

Лимон шарбати ёки лимон кислотаси сув қувури, кир ювиш машинаси ва чойнак ичидаги қотишмалардан халос бўлишда фойдали восита ҳисобланади. Лимон кислотасини сувда эритинг ва шу аралашма билан идишларни ювиб олишингиз мумкин. Лимон кислотасига бир неча томчи сирка қўшиш ҳам мумкин. Кейин уларни тоза сувда чайиб олиш кифоя.

Ош тузи

Туз қотиб қолган ёғни тозалашда кенг қўлланилади. Керамика ва чинни идишларни ювиш учун уларга туз сепиб, озгина илиқ сув қўшинг ва бир неча дақиқага қолдиринг. Сўнг илиқ сувда чайинг.