Ўзбекистондан Афғонистонга импорт қилинадиган электр энергияси техник носозликлар туфайли 50 фоизга камайди. Бу ҳақда Avapress хабар берди.
Афғонистон миллий электр компанияси (Da Afghanistan Breshna Sherkat) 19 февраль куни Ўзбекистондан импорт қилинадиган электр энергияси 50 фоизга камайганини маълум қилди. Шу сабабдан Кобул, Хулм ва Хонжон вилоятларидан ташқари, Афғонистонинг Парвон, Каписа, Панжшер, Самангон, Нангарҳор, Лағмон, Ғазни, Майдон-Вардак, Логар, Пактия ва Хост вилоятларида электр таъминотида узилишлар кучайган.
Афғонистон электр энергиясига бўлган эҳтиёжнинг катта қисмини қўшни давлатлар Эрон, Ўзбекистон ва Туркманистон орқали қоплайди. 2024 йилнинг январь ойи бошида Breshna ва Тожикистон ўртасида электр энергияси етказиб бериш бўйича шартнома узайтирилган.
Афғонистон миллий электр компанияси икки йилдан ортиқ вақт давомида электр импорти олдидаги қарзи учун тўртта давлатга 627 миллион доллар тўлади. Breshna Ўзбекистон, Тожикистон, Туркманистон ва Эрон олдидаги аввалги ҳукумат давридан қолган қарзлар тўлиқ узилганини маълум қилди.
Изоҳ (0)