O‘zbekiston Afg‘onistonga elektr energiyasi yetkazib berishni 50 foizga kamaytirdi

O‘zbekistondan Afg‘onistonga import qilinadigan elektr energiyasi texnik nosozliklar tufayli 50 foizga kamaydi. Bu haqda Avapress xabar berdi.

Afg‘oniston milliy elektr kompaniyasi (Da Afghanistan Breshna Sherkat) 19-fevral kuni O‘zbekistondan import qilinadigan elektr energiyasi 50 foizga kamayganini ma’lum qildi. Shu sababdan Kobul, Xulm va Xonjon viloyatlaridan tashqari, Afg‘onistoning Parvon, Kapisa, Panjsher, Samangon, Nangarhor, Lag‘mon, G‘azni, Maydon-Vardak, Logar, Paktiya va Xost viloyatlarida elektr ta’minotida uzilishlar kuchaygan.

Afg‘oniston elektr energiyasiga bo‘lgan ehtiyojning katta qismini qo‘shni davlatlar Eron, O‘zbekiston va Turkmaniston orqali qoplaydi. 2024-yilning yanvar oyi boshida Breshna va Tojikiston o‘rtasida elektr energiyasi yetkazib berish bo‘yicha shartnoma uzaytirilgan.

Afg‘oniston milliy elektr kompaniyasi ikki yildan ortiq vaqt davomida elektr importi oldidagi qarzi uchun to‘rtta davlatga 627 million dollar to‘ladi. Breshna O‘zbekiston, Tojikiston, Turkmaniston va Eron oldidagi avvalgi hukumat davridan qolgan qarzlar to‘liq uzilganini ma’lum qildi.