Биринчи февраль куни Лионель Месси ва Криштиану Роналду қарама-қаршилиги юзага келиши керак эди. Афсуски, “Ан-Насср” клуби ҳужумчиси Ар-Риёддаги учрашувни жароҳати сабаб ўтказиб юборди. Месси ҳам учрашувни асосий таркибда бошламади ва фақатгина 83-дақиқага келиб майдонга тушди. Учрашувда Саудия клуби ғалаба қозонди.
Роналду ва Месси ўртасидаги баҳсларда аргентиналик футболчининг кўпроқ омади чопган. Месси принципиал рақибини 17 учрашувда мағлуб этишга муваффақ бўлган, Роналдуда бу кўрсаткич 11 тага тенг. 9 учрашувда томонлар дурангга имзо чекишган.
Роналду ва Месси ўртасидаги биринчи баҳс 2008 йилнинг 23 апрелида бўлиб ўтган. Ўшанда Роналду 23 ёшда, Месси эса эндигина 20 ёшга кирган эди. Учрашувда аргентиналик футболчи Испаниянинг “Барселона” жамоаси, Роналду “Манчестер Юнайтед” жамоаси либосида ҳаракат қилган.
Чемпионлар Лигасининг ярим финал босқичидан ўрин олган учрашувда икки футбол юлдузи ҳам илк дақиқалардан иштирок этди.
Учрашувнинг биринчи бўлимида “Барса” ҳимоячиси Милито тўпни қўли билан тўхтатди. Ҳакам пенальти нуқтасини кўрсатди. Тўпга зарба берган Роналду дарвозабон Виктор Вальдесни чалғитишга эришди аммо у тепган тўп дарвоза ёнидан ўтиб кетди. Ўшанда футболчига мухлисларнинг шовқини ҳалақит қилган бўлиши мумкин. Каталонияда бўлиб ўтган учрашувда ҳеч ким дарвозани ишғол эта олмади.
Англиядаги жавоб учрашувида Пол Скоулзнинг голи учрашувда ягоналигини сақлаб қолди ва “Манчестер Юнайтед” финалга йўл олди.
2008 йилнинг якунида Роналду ўзининг биринчи “Олтин тўп”ини қўлга киритди. Бир йил ўтиб, Испаниянинг “Реал Мадрид” клубига кўчиб ўтган футболчи “Роналду-Месси” қарама-қаршилигига ўзгача жозиба ато этди.
Изоҳ (0)