Тошкент шаҳар ҳокимлиги 18-февал куни кучли қор ёғишидан огоҳлантирди.
Хабарда 18 февраль куни кучли қор ёғиши, камида 12 соат давом этиши кутилаётгани, дастлабки маълумотларга кўра, ёғингарчилик ҳажми икки ойлик меъёрдан ошиши билдирилди. Бир оздан сўнг хабар таҳрирланиб, қор ёғиши бир неча соат давом этиши кўрсатилди.
Шу муносабат билан пойтахт ҳокимлиги аҳолидан қуйидагиларни сўради:
- заруратсиз уйдан чиқмасликни, шахсий транспорт воситаларидан фойдаланишни минималлаштиришга ҳаракат қилишни ва ҳаракатланиш учун жамоат транспортидан фойдаланишни;
- қор ва муз массалари тушиши мумкин бўлган кўп қаватли бинолардан сақланишни;
- қулоқчин таққан ҳолда ташқарига чиқмасликни (бу яқинлашиб келаётган машина ёки қор тушишини эшитмай қолишингизга олиб келиши мумкин);
- автомобилларни кўп қаватли бино ва иншоотлар, шунингдек, дарахтлар тагида қолдирмасликни.
Шунингдек, электр ёки газ таъминотида узилишлар юзага келган тақдирда Марказий диспетчерлик хизматининг 1055 рақамига ёки Telegram орқали мурожаат қилиш мумкинлигини билдириб ўтди.
Маълум қилинишича, қор ёғиши оқибатларини тезкорлик билан бартараф этиш учун ҳокимлик хизматлари, Йўл ҳаракати хавфсизлиги бош бошқармаси, Тошкент шаҳар ободонлаштириш бош бошқармаси ва бошқа тегишли ташкилотлар шай ҳолатда.
“Ўзгидромет” берган маълумотга кўра, Тошкентда 18 февраль куни ҳарорат кечаси 3-5 даража совуқ, кундузи 0-2 даража илиқ бўлади.
Изоҳ (0)